«Aıqyn» baqylaý júıesi 2015 jyly barlyq eldi qamtıtyn bolady

ASTANA. QazAqparat - 2015 jylǵa deıin "Aıqyn" baqylaý júıesi elimizdiń barlyq memlekettik organdaryn aýdandyq deńgeıge deıin túgeldeı qamtıtyn bolady. Bul týraly búgin Astanada QR Bas prokýratýrasy Quqyqtyq statıstıka jáne arnaıy esepke alý jónindegi komıtettiń tóraıymy Sáýle Aıtbaeva málim etti.

Jobanyń ereksheligi sonda, ol arqyly azamattar men uıymdar alǵash ret ınternet arqyly óz ótinishteri men aryz-shaǵymdarynyń qaralý barysyn qadaǵalap otyrady. "Aıqyn" jobasy Qazaqstanda 2011 jyly quryla bastady. Al 2014 jyldyń qańtarynan bastap, barlyq oblystyq máslıhattar men oblystyq deńgeıdegi memlekettik organdarǵa engizildi. "Onyń mehanızmi óte qarapaıym - ózi tikeleı aparyp ótinish tapsyrǵan kez kelgen azamat nemese zańdy tulǵa derbes nómiri bar talon alyp, ol arqyly bizdiń saıttan óz aryzynyń búkil qaralý barysyn - oryndaýshysy kim, qashan tirkeldi, qashan jaýap berildi - osylardy túgeldeı qadaǵalap otyrady", - dedi S. Aıtbaeva. Qazirgi ýaqytta "Aıqyn" júıesine ortalyq memlekettik organdar jáne oblystyq ákimshilikterden bastap, olardyń qalalyq býyndaǵy bólimshelerine deıingi ár deńgeıdegi 1673 memlekettik organ qosylǵan. "Azamattar óz ótinishterin kóbine poshta arqyly jiberedi. Biz muny da eskerip, búgingi kúni óz hatyn tapsyrys boıynsha jibergen azamattarǵa talon berý jaıyn "Qazposhta" aktsıonerlik qoǵamymen kelisip jatyrmyz", - dep atap ótti komıtet tóraǵasy.