Aıkúmis Dosanova: Parlamenttik oppozıtsııa zańnyń durystyǵyna septigin tıgizedi

AQTAÝ. QazAqparat - Parlamenttik oppozıtsııa ınstıtýty zańnyń durystyǵyna septigin tıgizedi. Ulttyq qoǵamdyq senim keńesiniń otyrysyndaǵy Prezıdent Qasym-Jomart Toqaevtyń usynysy týraly Mańǵystaý oblysy Túpqaraǵan aýdany máslıhatynyń hatshysy Aıkúmis Dosanova áleýmettik jelidegi paraqshasynda osyndaı pikir bildirdi, dep habarlaıdy QazAqparat tilshisi.

Aıta keteıik, 20 jeltoqsanda elordada ótken Ulttyq keńestiń ekinshi otyrysynda Memleket basshysy «Parlamenttik oppozıtsııa ınstıtýtyn qurý» týraly usynys aıtqan bolatyn.

Osy usynysty máslıhat hatshysy Aıkúmis Dosanova da qoldaıdy. Onyń aıtýynsha, qoǵamda neniń durys, neniń qate ekeni birdeı pikir aıtylǵanda ǵana kórinedi.

«Aqıqat - bireý, biraq árkimniń óz shyndyǵy bar. Qoǵam da, dúnıe de oń men teristen, aq pen qaradan, durys pen qısyqtan quralǵan. Onyń birin kórip, birin kórmeýge bolmaıdy. Neniń durys, neniń qısyqtyǵy - eki pikir de aıtylyp, saraptalyp, is júzine asqanda kórinedi. Sondyqtan, zańymyz durys bolsyn desek - parlamenttik oppozıtsııa kerek» dep jazdy ol.

Aıta keteıik, Prezıdent bul másele týraly: «Bizge parlamenttik oppozıtsııa ınstıtýty qajet. Biz jańa qoǵamdyq paradıgmanyń basty sharty balama kózqarastar men pikirler ekenin túsinýimiz kerek. Sońǵy jyldary óz ustanymdaryn ashyq bildirip júrgen belsendi azamattar birqatar áleýmettik-ekonomıkalyq máselelerdi sheshýge atsalysty. Biz balama pikirler men qoǵamdyq talqylaý toqyraýdyń bastaýy emes, kerisinshe, damýdyń basty talaptarynyń biri ekenine kóz jetkizdik», - degen edi.