Aıkórkem Meldehannyń ólimi boıynsha sot protsesine ákesi nege jiberilmedi – Bas prokýratýranyń jaýaby

ASTANA. QazAqparat - Almaty garnızonynyń áskerı sotymen kámeletke tolmaǵan Aıkórkem Meldehannyń ólimine ákep soqqan bılikti asyra paıdalandy (QR QK 1-tarmaǵynyń 451-baby 2-bóligi) degen aıyppen áskerı qyzmetshi A.I.Jumanǵa qatysty qylmystyq is qaralýda.

Sot protsesi is materıaldarynda jarııalaýǵa jatpaıtyn qupııa qujattardyń bolýyna baılanysty jabyq rejımde ótýde, dep habarlaıdy QazAqparat QR Bas prokýratýrasynyń baspasóz qyzmetine silteme jasap.

Búgin qaıtys bolǵan Aıkórkemniń ákesi - Aıdos Meldehan BAQ ókilderine memlekettik qupııalarǵa ruqsattyń bolmaýynan sot protsesine jiberilmeıtinin aıtty.

Aıdos Meldehanǵa memlekettik qupııalarǵa ruqsatty rásimdeý birneshe ret, onyń ishinde bıylǵy 19 shildede Bas áskerı prokýratýra basshylyǵymen jeke qabyldaýda usynylǵanyn málimdeımiz. Alaıda ol ony rásimdeýden jáne arnaıy tekserýden ótýden bas tartty.

Bul týraly qylmystyq is materıaldarynda tirkelgen óz qolymen jazǵan aryzy kýálandyrady.

Memlekettik qupııalary bar barlyq qylmystyq ister boıynsha ruqsatty rásimdeý mindetti talap bolyp tabylatynyn aıtyp ótkenimiz jón.

Bul rette, advokat pen qaza tapqan Aıkórkemniń týǵan aǵasy – Baýyrjan Meldehanovqa bıylǵy sáýir jáne maýsymda memlekettik qupııalarǵa, tıisinshe qylmystyq istiń barlyq materıaldaryna ruqsat berildi.

«Jábirlenýshilerdiń quqyqtarynyń saqtalýyn olardyń múddelerin bildiretin kásibı advokat qamtamasyz etetinin atap ótemiz.

Sonymen qatar, kórineý jalǵan málimetterdi taratý zańnamada belgilengen jaýapkershilikke ákep soqtyratynyn túsindiremiz.

Azamattardy tek resmı aqparat kózderine senýge shaqyramyz»,-delingen Bas prokýratýranyń habarlamasynda.