Aıkórkem Batıhan dástúrli sadaq atýdan Túrkııadaǵy týrnırde top jardy

ASTANA. KAZINFORM – Dástúrli sadaq atýdan Qazaqstan ulttyq quramasynyń sportshysy Aıkórkem Batıhan Túrkııanyń Ystanbul qalasynda ótken «Fetih Kupası» («Jeńis kýbogy») týrnırinde jeńimpaz atandy.  

Astana ákimdigi saıtynyń habarlaýynsha, Aıkórkem Batıhan bul tarıhı jeńiske 50 metr qashyqtyqta dıametri 50 sm bolatyn Pýta nysanasy boıynsha jarysta qol jetkizgen. Sondaı-aq 12-shi ret ótip otyrǵan «Fetih Kupası» halyqaralyq týrnırine álemniń 20 elinen 300-ge jýyq sportshy qatysqan. 

«Fetih Kupası» halyqaralyq týrnıri – dástúrli sadaq atý boıynsha eń iri jarystardyń biri. Bul saıysta tabysty óner kórsetý jáne jeńiske jetý – qazaqstandyq barlyq sadaqshynyń armany. Bul jarys Túrkııada 12 jyl boıy dástúrli túrde uıymdastyrylyp kele jatyr. Qazaqstandyq sportshylar oǵan 2017 jyldan beri qatysyp keledi, biraq buǵan deıin jeńiske jetpegen edik. Bıyl bizdiń sportshylar fınalǵa shyqty: 4 qyz jáne 4 er adam joldama aldy. Fınalda Aıkórkem Batıhan Túrkııanyń eń myqty sadaqshysymen kezdesip, ony 5:4 esebimen jeńdi. Aıkórkemniń jeńisi – búkil komandamyz úshin úlken jetistik», - dedi dástúrli sadaq atýdan Qazaqstan ulttyq quramasynyń bas bapkeri Dıas Ahmetov. 

19 jastaǵy Aıkórkem Batıhan – astanalyq sportshy. Onyń dástúrli sadaq atýmen aınalysyp júrgenine 1,5 jyl bolǵan.