«Aıqaılap» turatyn ataýynan basqa túgi joq: Prezıdent jalǵan qoǵamdyq uıymdar jaıynda
ASTANA. KAZINFORM — Birqatar respýblıkalyq qoǵamdyq birlestiktiń «aıqaılap» turatyn ataýlarynan basqa túgi joq. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Maǵan birqatar respýblıkalyq qoǵamdyq birlestiktiń tek qaǵaz júzinde tirkelgeni, shyn máninde, «aıqaılap» turatyn ataýlarynan basqa túgi joq, jalǵan qurylymdar ekeni baıandaldy. Mundaı uıymdar azamattar múddesin qorǵaý úshin emes, basqa pıǵylda, berisin aıtsaq, mansapqorlyq maqsatta qurylǵany anyq. Bul keıbir jaǵdaıda alaıaqtyqqa deıin jetti. Oǵan jol berýge bolmaıdy, — dedi Memleket basshysy.
Osy rette Prezıdent mundaı faktiler quqyq qorǵaý organdarynyń nazaryna joldanatynyn basa aıtty.
— Tek memlekettik tapsyrysty ıgerý maqsatynda qurylǵan «qyzmet kórsetý» uıymdarynyń jumysyna tosqaýyl qoıý qajet. Jalpy, Halyq Keńesi qoǵamǵa uıytqy bolýǵa tıis. Elimizde kóptegen konsýltatıvtik-keńesshi organ bar, alaıda basym bóliginiń qyzmeti shashyrańqy, bir-birin qaıtalaıdy. Olardyń jumysyn úılestirip, saraptamalyq áleýetin biriktirý jáne kelip túsken usynystardy júıeleý Halyq Keńesine júkteledi, — dedi Qasym-Jomart Toqaev.
Aıta keteıik, jıyn barysynda Prezıdent Konstıtýtsııa ár adamnyń qolynda júretin, jumys ústelinde turatyn qujat bolýǵa tıis ekenin aıtty.
