Aıqasqa daıynmyn – Batyr Júkembaev Kanadadaǵy aıqasy aldynda málimdeme jasady
Aıqas aldyndaǵy baspasóz máslıhatynda Batyr Júkembaevtyń qarsylasy – meksıkalyq Rıkarda Laramen kóz arbasty.
«Reseıdegi Bupas Gym zalynda óz bapkerimmen óte jaqsy jattyǵý alańynan óttim. Montreal Casino-daǵy basty jekpe-jekke shyǵatynymyna qýanyshtymyn. Aıqasqa daıynmyn. Bárine rahmet», - dep keltiredi Batyr Júkembaevtyń sózin «Qazaqstan kásipqoı boksy» federatsııasy.
Sonymen birge boksshy óziniń Instagram-paraqshasynda jankúıerleri bul keshke qyzyǵýshylyq tanytyp otyrǵanyn aıtyp ótti.
«Jekpe-jek aldyndaǵy press-konferentsııa sátti ótti! Alla qalasa erteń salmaq ólsheý rásimi! Bul jekpe-jegime Kanadalyq boks jankúıerleri men BAQ ókilderi úlken qyzyǵýshylyq bildirýde. Al qazaqstandyq boks súıer qaýym, 26 qańtarda 8:30-da #Habar arnasynyń tikeleı efırinen kezekti aıqasymdy tamashalaı alasyzdar», - dep jazdy Batyr Júkembaev.
Kanadada ótetin atalmysh keshke barlyq bıletter satylyp ketkenin buǵan deıin habarlaǵan edik. Áýelde B.Júkembaevtyń IBF Latino chempıony argentınalyq Maksımılıano Rıkardo Veronǵa (12-3-1, 4 KO) qarsy aıqasatyny jarııalanǵan bolatyn. Alaıda onyń qarsylasy aıaq astynan aýysyp, ol «Rıkı» laqap atty meksıkalyq Rıkardo Laramen (22-7, 10KO) kezdesetin boldy.
Kezdesýdi «Habar» arnasy tikeleı efırden 26 qańtar kúni tańerteń kórsetedi.
Esterińizge sala keteıik, Batyr Júkembaev byltyr 26 qyrkúıek kúni Monrealda meksıkalyq Mıgel Vaskeske qarsy (41-9, 15 KO) ótkizgen sońǵy judyryqtasýynda tóreshilerdiń biraýyzdy sheshimimen jeńiske jetken bolatyn. Halyqaralyq boks uıymynyń (IBO) reıtınginde ol óz salmaǵynda 11-shi orynda tur.