«Aıqapta» jarııalanǵan M.Dýlatulynyń «Oıan, qazaq!» maqalasy halyqtyń kózin ashqan, buqaralyq oıǵa sáýle sepken týyndy - Ǵ. Mutanov
ALMATY. 23 sáýir. QazAqparat /Ádilet Musahaev/ - «Aıqap» jýrnaly men «Qazaqstan» gazeti qazaq taǵdyry men tarıhynda qaldyrǵan iziniń mańyzyn ańǵarý úshin eki máseleni tereń túsinýimiz qajet. Bul jaıynda tarıh ǵylymdarynyń doktory Mámbet Qoıgeldıev keshe Stýdentter saraıynda tuńǵysh ulttyq merzimdi basylymdarǵa baılanysty ótken ǵylymı-tájirıbelik konferentsııa barysynda aıtty.
«Aıqap» jýrnaly men «Qazaqstan» gazetiniń jaryqqa shyǵýynyń 100 jyldyǵyna arnalǵan ǵylymı-tájirıbelik konferentsııa barysynda alǵashqy qazaq basylymdarynyń ulttyq jýrnalıstıka tarıhyndaǵy salmaǵyn, mańyzdylyǵyn, úlesin jan-jaqty qarastyrǵan basqosýǵa ýnıversıtet ujymymen qatar otandyq buqaralyq aqparat quraldarynyń ókilderi, ǵalymdar, ádebıetshiler, tarıhshylar jáne zııaly qaýym ókilderi men stýdentter qatysty.
Zertteýshi-ǵalymdar qos basylymdy jalpyulttyq demokratııalyq baspasóz kóshbasshylary dep atady. Bul basylymdar HH ǵasyr basyndaǵy ult ómiriniń, qazaq qoǵamynyń aınasy boldy. Ulttyq jýrnalıstıkanyń damýy osy basylymdardan bastaý alady deıdi konferentsııaǵa qatysýshylar.
Basylym betterinde kóterilgen máseleler búginde de kún tártibinen túspeı, sol kezdegi taqyryptar búgin de mańyzdylyǵyn joımaǵandyǵyn tilge tıek etken QazUÝ rektory Ǵalymqaıyr Mutanov «Aıqapta» jarııalanǵan M.Dýlatulynyń «Oıan, qazaq!» maqalasy halyqtyń kózin ashqan, buqaralyq oıǵa sáýle sepken týyndy ekendigin atap ótti. «Aıqap» jýrnaly qazaq halqynyń kóziniń qarashyǵy atansa, «Qazaqstan» gazeti el janarynyń aǵy bola bilgeni aqıqat. Qazaq baspasóziniń demokratııalyq qundylyqtaryn ustaný jolynda halqynyń qulaǵy hám kózi bola bilgen «Aıqap» jýrnaly men «Qazaqstan» gazeti búgingi buqaralyq aqparat quraldaryndaǵy dástúrler jalǵastyǵyna úlgi bolary sózsiz», - deıdi rektor.
Al tarıh ǵylymdarynyń doktory Mámbet Qoıgeldıev óz kezeginde «Aıqap» jýrnaly men «Qazaqstan» gazeti qazaq taǵdyry men tarıhynda qaldyrǵan iziniń mańyzyn ańǵarý úshin eki máseleni tereń túsinýimiz qajet ekendigin aıtady. «Olar - ultshyldyq pen aǵartýshylyq. Osy eki máseleni jetik túsinbeı qazaq tarıhyn taný qıyn. Osy rette qazaq zııalylarymyzdyń bul basylymdardy jaryqqa shyǵarýy - aǵartýshylyq jumystardyń jeńildep, eldiń sanasyn oıatyp, ult azattyq ıdeologııanyń qalyptasýyna úlken úles qosqanyn erekshe atap ótemiz. Bul qos basylym az ǵumyrda halyqty, ult azattyq kóteriliske turǵyza bildi desek, artyq aıtqandyq emes», - dep atap ótti óz sózinde tarıhshy.
Qazaq baspasózi izasharlarynyń úles-salmaǵyn baǵalaǵan konferentsııa odan keıin jýrnalıstıka, fılologııa jáne tarıh fakýltetterinde qazaq baspasózi máselelerin kótergen dóńgelek ústelmen jalǵasty.
