«Aıkanyń» «Oskar» alýǵa múmkindigi bar - kartına rejısseri
ASTANA. QazAqparat - Amerıkanyń «Oskar» kınojúldesiniń «Shetel tilindegi úzdik fılm» atalymynda short-paraqshaǵa qosylǵan «Aıka» kartınasynyń rejısseri Sergeı Dvortsevoı qazylar alqasynyń tańdaýyn kútpegen jaǵdaı jáne úlken tabys dep ataǵan, - dep habarlaıdy TASS.
«Árıne, bul úlken tabys. Men qýanyshtymyn, ondaǵy quram óte kúshti, nomınatsııaǵa kirý ońaı bolmas, sebebi kartınalar óte myqty. Basqa jyldarmen salystyra almaımyn, biraq bıylǵy kartınalar óte myqty... Biraq múmkindigimiz bar, sebebi bizdiń kartınamyz da jaqsy», - dedi S.Dvortsevoı.
Ol sondaı-aq fılmniń short-paraqshaǵa qosylýy ol úshin kútpegen jaǵdaı ekenin atap ótti.
«Biz ony kútpegen edik, sebebi oskarlyq naýqanǵa óte kesh qosyldyq - kartınamyz kópke deıin aıaqtalmaǵan edi... Kóp adam osynshama kesh túsire bastap, tabystarǵa jetýge bolatynyna sengen joq. Adamdar kartınany kórip te úlgermeıtini aıtylǵan», - dedi rejısser.
«Aıka» fılminiń sıýjeti - Qyrǵyzstannan Máskeýge kelip, onda zańsyz jumys istep júrgen jas emıgrant áıeldiń oqıǵasy, onyń ishki adamı ósýi, analyq sezimi. Basty róldi qazaqstandyq aktrısa Samal Eslıamova somdaǵan. Ol 71-shi Kann kınofestıvaliniń úzdik aktrısasy dep tanyldy.
«Shetel tilindegi úzdik fılm» kategorııasynda «Oskar» júldesin alýǵa bastapqyda 87 kartına usynylǵan. «Aıka» dramasyn Qazaqstan usyndy. Short-paraqshaǵa sondaı-aq «Jyl qustary» (Birds of Passage, Kolýmbııa), «Kináli» (The Guilty, Danııa), «Avtorlyqsyz jumys» (Never Look Away, Germanııa), «Shoplıfterler» (Shoplifters, Japonııa), «Kapernaým» (Capernaum, Lıvan), «Roma» (Roma, Meksıka), «Qyrǵı-qabaq soǵys» (Cold War, Polsha) jáne «Jalyndaǵan» (Burning, Ońtústik Koreıa Koreıa) lentalary kirgen.
2018 jylǵy kınematograf salasyndaǵy jetistikter úshin «Oskar» syılyǵyn tabystaýdyń 91-shi rásimi 2019 jyldyń 24 aqpanynda ótedi. Úzdikterdi marapattaý Los-Andjeles qalasynyń Dolby teatrynda ótkiziledi.
