«Aıka» úshin uıalmaısyzdar - Samal Eslıamova
ASTANA. QazAqparat - Kann festıvaliniń jeńimpazy Samal Eslıamova "Aıka" fılmindegi róli týraly aıtyp berdi. Osy oraıda jýrnalıster uıatty kadrlardyń bar-joǵyn surady, dep xabarlaıdy QazAqparat tilshisi.
"Men - qazaq qyzymyn. Ózim de ashyq-shashyq kınolardy jaqtyrmaımyn. Sebebi bizdiń boıymyzda ar-uıat degen sezim bar. Endi, kınoda keıipkerdiń obrazyn shynaıy oınaǵanda kerek kadrlar bolady. Ony da túsiný kerek. Degenmen, shekten shyqpaý qajet. Ártis osyny jaqsy túsinýi kerek dep oılaımyn. Bul fılmde ondaı kadrlar joq. Sondyqtan "Aıka" úshin uıalmaısyzdar", - dedi S.Eslıamova jýrnalısterge bergen suxbatynda.
Ártistiń aıtýynsha, fılmniń eń sońǵy epızody ony qatty tebirentti. Ol jerde balasyn tastap ketken ana óz qateligin túsinedi. "Fılmde meniń keıipkerim óz balasyn tastap ketedi. Biraq artynan izdep barady da, ózimen birge alyp ketedi. Bul epızod meni qatty tebirentti. Endi, ózim áli turmysqa shyqqan joqpyn. Balalarym da joq. Qudaı qalasa, bolady degen úmitim bar. Biraq kez kelgen adam úshin ananyń orny bólek qoı. Ana men bala arasyndaǵy qatynas qashanda ystyq ári júrekke jaqyn. Sondyqtan sońǵy epızod meni qatty tolǵandyrdy", - dep atap kórsetti S.Eslıamova.
Fılm rejısseri Sergeı Dvortsevoıdyń aıtýynsha, fılmde balany emizgende dýblerdiń kómegine júginýge týra keldi. Sebebi balany kádimgideı emizý kerek edi. Qalǵanyn Samaldyń ózi oınap shyqty. Kann festıvalinde shıki materıal kórsetilse de, ádilqazylar alǵashqy 40 mınýtty kórgennen keıin birden baıqaýǵa qatysýǵa ruqsat berdi. "Festıval dırektory eki kúnniń ishinde jınap berseń, qabyldaımyz dedi. Biz ile-shala fılmdi jınaýǵa kiristik. Sóıtip, eki kúnniń ishinde daıyndap shyqtyq. Jartylaı daıyn materıal bolsa, Samaldyń ártistik sheberligi ádilqazylardy beı-jaı qaldyrmady. Áli esimde, zaldan shyqqannan keıin bir áıel kelip, Samaldy qatty qushaqtap, biraz turdy. Sóıtse, ádilqazylar alqasynyń tóraıymy Keıt Blanshet eken. Onyń úndemeı kelip, Samaldy qatty qushaqtaǵanynan fılmniń unaǵanyn túsindik. "Aıka" bir-bir jarym aıda tolyǵymen daıyn bolady. Al kúzde prokatqa shyǵady", - dep atap kórsetti S.Dvortsevoı.
Aıta keteıik, qazaqstandyq aktrısa Samal Eslıamova 71-inshi Kann kınofestıvalinde «Úzdik áıel róli» atalymynda jeńimpaz atanǵan bolatyn. Atalǵan marapatty ol reseıik rejısser Sergeı Dvortsevoıdyń «Aıka» atty kartınasyndaǵy róli úshin aldy. Fılmde Máskeýge jumysqa barǵan qyrǵyz qyzynyń taǵdyry jaıynda baıandalady. Búgin Samal Eslıamova Astanaǵa ushyp keldi. Áýejaıda aktrısany qazaq jastary Muqaǵalı Maqataevtyń «Qazaqstan» atty óleńine jazylǵan ánmen qarsy aldy. «Sen meniń súıegim men qanymdasyń, Janymdasyń, uıatym, arymdasyń», dep án salǵan jastardyń keıbiri ulttyq naqyshtaǵy kıim kıip kelgen.
