«Aıka tizimi»: eskort bıznesin uıymdastyrýshynyń isi boıynsha úkim ózgerissiz qaldy

ALMATY. KAZINFORM — Almaty qalalyq sotynda 6,5 jylǵa sottalǵan elıtalyq eskort qyzdar jelisin uıymdastyrýshy Aıkanyń isi qaıta qaraldy. 

Almaty qalalyq sottyń baspasóz qyzmeti málim etkendeı, buǵan deıin birinshi satydaǵy sot M.-ny asa iri mólsherde psıhotroptyq zatty zańsyz alý, saqtaý jáne tasymaldaý, sondaı-aq 52 epızod boıynsha jeńgeıtaılyqpen aınalysý (QK 296-babynyń 4-bóligi, 309-babynyń 2-bóliginiń 1-tarmaǵy) boıynsha kináli dep tanylyp, 6,5 jylǵa bas bostandyǵynan aıyrý jazasy taǵaıyndalǵan bolatyn.

T. 12 epızod boıynsha jeńgetaılyqqa kómektesti dep tanylyp (QK 28-babynyń 5-bóligi, 309-babynyń 2-bóliginiń 1-tarmaǵy) 3 jyl 8 aı bas bostandyǵynan aıyrý jazasy taǵaıyndalǵan.

Sot úkimimen kelispegen aıyptalýshylar apellıatsııalyq shaǵym túsirgen bolatyn.

«Apellıatsııa, qylmystyq isti zertteı otyryp, sottalǵandarǵa qatysty aıyptaýdyń tolyq rastaýyn tapqanyn atap ótti», — delingen habarlamada.

2023 jyldyń mamyr aıynda M., asa iri mólsherde mefedrondy psıhotroptyq zatty satý maqsatynsyz zańsyz satyp alyp, ózimen birge zańsyz tasymaldaǵan. Ustaý kezinde polıtsııa qyzmetkerleri sottalýshynyń sómkesinen psıhotroptyq zat tárkilegen.

2020-2023 jyldar aralyǵynda M., T.-men birge jeńgetaılyq uıymdastyryp, qyzdardy ıntımdik qyzmet kórsetý úshin paıdalandy. M. osy qyzmetterden jeke ózine nemese óz kómekshisi T. arqyly paıyz aldy.

Sottalýshylardyń kinási kýálardyń aıǵaqtarymen, saraptamalyq qorytyndylarmen jáne is boıynsha basqa da materıaldarmen dáleldendi.

Apellıatsııa úkimdi ózgerissiz qaldyrdy.

Sot úkimi zańdy kúshine endi.

Eske salaıyq, mamyr aıynda Almaty qalasynyń Áýezov aýdandyq soty qoǵamdy eleń etkizgen «Aıka tizimi» boıynsha qylmystyq iske úkim shyǵarǵan bolatyn.

Aıta ketsek, atalǵan jaıt boıynsha Ádilet mınıstri Azamat Esqaraev ta óz oıyn aıtqan edi.

Keıin Qazaqstan Respýblıkasy Іshki ister mınıstriniń birinshi orynbasary Marat Qojaev ta «Aıka tizimi» qylmystyq isine qatysty pikir bildirdi.