«Aıka» fılminiń rejısseri «Oblysqa sińirgen eńbegi úshin» medalimen marapattaldy - OQO
ShYMKENT. QazAqparat - Búgin Ońtústik Qazaqstan oblysynyń ákimi Janseıit Túımebaev Kann kınofestıvalinen keıin kópshilikke tanylǵan «Aıka» fılminiń rejısseri Sergeı Dvortsevoımen kezdesti. Elimizdiń kınematografııa salasyn damytýǵa úlesin qosyp júrgen jáne onyń álemdik deńgeıde tanymal bolýyna qosqan úlesi úshin kınorejısser Sergeı Dvortsevoıǵa óńir basshysy jerlesteriniń atynan shynaıy alǵysyn jetkizip, «Oblysqa sińirgen eńbegi úshin» medalimen marapattady, dep habarlaıdy QazAqparat tilshisi.
Kezdesý barysynda aımaq basshysy rejısserdi Qazaqstan men Reseı arasyndaǵy mádenı baılanystardy nyǵaıtý jolyndaǵy eńbegine sáttilik tiledi.
«Siz túsirgen «Aıka» fılmi 71-shi Kann kınofestıvalinde əlemdik deńgeıdegi eń úzdik 20 kartınanyń quramynda qazylar alqasynyń, kıno synshylar men eýropanyń talǵampaz kórermeniniń joǵary baǵasyna ıe boldy. Sizdiń kəsibı sheberligińizdiń jəne rejısserlik deńgeıińizdiń joǵary bolýynyń arqasynda qazaqstandyq Samal Eslıamova úzdik əıel róli úshin joǵary marapatqa ıe boldy. Mundaı jaǵdaı, postkeńestik elder arasynan shyqqan ərtistiń osyndaı marapatqa ıe bolýy Kann festıvali tarıhynda buryn-sońdy bolmaǵanyn eskersek bul úlken oqıǵa!»,-dedi Janseıit Qanseıituly.
Óz kezeginde Sergeı Dvortsevoı da oblys ákimdigi tarapynan kórsetilip jatqan qurmet pen qoshemet úshin alǵysyn bildirip, aldaǵy ýaqytta Qazaqstannyń kınematografııa salasynyń damýy jolynda aıanbaı eńbek etetinin senimmen jetkizdi. Sonymen qatar Ońtústik óńirinde kınoındýstrııany damytýǵa erekshe kóńil bólinip, jan-jaqty qoldaý kórsetilip jatqanynan habary bar ekenin aıtyp ótti.
Osy rette aımaq basshysy oblysta búginde onǵa jýyq kınostýdııanyń bar ekenin aıtyp, solardyń biri halyqaralyq festıvaldardyń jeńimpazy, jas urpaqty tárbıeleýge arnalǵan qazaq tilindegi 50-ge jýyq anımatsııalyq fılm túsirgen «Saq» kınostýdııasyn atap ótti.
«Elbasynyń «Bolashaqqa baǵdar: rýhanı jańǵyrý» maqalasy aıasynda tarıhı-mádenı muralardy nasıhattap, jastarǵa patrıottyq tárbıe berý maqsatynda 2017 jyly «Ońtústikfılm» men «Saq» kınostýdııasy birlesip «Kóne jetigenniń syry» atty 10 serııaly telehıkaıa, «Kıeli Qazyǵurt», «Otyrardy qorǵaý», «Kúsh atasy - Qajymuqan» atty anımatsııalyq jáne «Uly Jibek Jolyndaǵy eskertkishter» derekti fılm túsirildi.Al osy jyldyń sońyna deıin «Tóle bı» kópserıaly fılmi men «Ordabasy - birliktiń týy», «Kóne Túrkistan», «Oqsyz oqıǵasy» atty anımatsııalyq fılmder túsiriledi»,- dedi oblys ákimi.
Aıta keteıik, Sergeı Dvortsevoı 1962 jyly Shymkent qalasynda dúnıege kelgen. Nıkıta Mıhalkovtyń «Nıka» syılyǵynyń laýreaty. Álemdik deńgeıdegi mamandardy moıyndatqan kınony túsirgen ol buǵan deıin, «Trassa», «V temnote» derekti fılmder men qysqa metrajdy «Schaste», «Hlebnyı den» kıno týyndylaryn túsirip, kóptegen halyqaralyq festıvaldar men baıqaýlardyń qatysýshysy atanǵan. Al 2008 jyly «Tıýlpan» fılmi Kann kınofestıvalinde «Erekshe kózqaras» atalymy boıynsha marapattalǵan.
