«Aıka» fılmi kınoteatrdan qashan kórsetiledi
ASTANA. QazAqparat - Reseılik rejısser Sergeı Dvortsevoıdyń «Aıka» kartınasy 14 aqpanda Reseı men Qazaqstan kórermenderine usynylady, dep habarlaıdy QazAqparat. Bul aqparatty «Kinopark Theatres» jelisiniń PR dırektory Erlan Buharbaev rastady.
YouTube jelisinde kınokartınanyń treıleri jarııalandy. Onda perzenthanaǵa jańa týǵan sábıin tastap qashqan Aıkany kórýge bolady. Fılmde Qyrǵyzstannan Máskeýge kelip, onda zańsyz jumys istep júrgen jas emıgrant áıeldiń oqıǵasy, onyń ishki adamı ósýi, analyq sezimi baıandalady.
Basty róldi qazaqstandyq aktrısa Samal Eslıamova somdaǵan. Ol byltyr 71-shi Kann kınofestıvalinde úzdik aktrısa atanǵan bolatyn.
Sondaı-aq, fılm «Oskar» júldesiniń «Shetel tilindegi úzdik fılm» sanatynda toǵyz kartınadan turatyn qysqa tizimine endi. Biraq, «Aıka» bes fılmnen turatyn «Oskardyń» sońǵy úmitkerleriniń tizimine enbeı qaldy.
