«Aıka» fılmi Belgııada kınoprokatqa shyqty
BRıÝSSELЬ. QazAqparat - Basty rólde qazaqstandyq aktrısa Samal Eslıamova oınaıtyn Sergeı Dvoretskııdiń «Aıka» fılmi Belgııada kınoprokatqa shyqty, dep habarlaıdy QazAqparat menshikti tilshisi.
«Aıka» dramasy buǵan deıin Eýropanyń birneshe elinde kórsetilgen. Bul fılmdi Germanııa, Polsha, Portýgalııa, Frantsııa jáne Shvetsııa kórermenderi tamashalady.
Brıýsseldiń eń ejelgi kınoteatrlarynyń biri sanalatyn Cinema Palace beısenbi keshkisin kórermenderge toly boldy. Belgııadaǵy premeraǵa Samal Eslıamovanyń ózi - úzdik áıel rólin somdaǵany úshin Kann festıvaliniń júldegeri atanǵan aktrısa da ushyp keldi.
Jurtshylyq kartınany bir demmen tamashalap, sońǵy tıtrlardan keıin zal «Bravo!» dep aıqaılady. Olar qazaqstandyq aktrısanyń sheberligine súısinip, dý qol shapalaqtady. Budan keıin kórermender Samal Eslıamovaǵa gúl shoqtaryn syılady.
«Bul bas keıipkerdiń taǵdyryna birge sezinetin keremet kıno. Fılm kórermenderdi bastan aıaq zer salyp tamashalaýǵa múmkindik beredi. Biz Aıka úshin ýaıymdap, ózimizge beıtanys ortaǵa túsip kettik», - dep bólisti rejısser Koko Výter.
Jergilikti BAQ «Aıka» fılmin 1999 jyly ekranǵa shyqqan belgııalyq aǵaıyndy rejısserler Dardennderdiń «Rozetta» dramasymen salystyryp jatyr.
«Osy kınodan keıin óz qıyndyqtaryma shaǵymdanǵym kelmeıdi. Lentada birneshe másele, sonyń ishinde kóshi-qon máselesi kóterilgen. Meni fılmde janýarlarǵa jáne adamdarǵa degen qarym-qatynas tolǵandyrdy. Ókinishke qaraı, keıde adamdarǵa qaraǵanda janýarlarǵa jaqsy qaraıdy», - dep bólisti Brıýssel turǵyny Sabına Asanova.
«Aıka» fılmin 16 jáne 24 mamyrda Nıderland pen Aýstrııa kórermenderi tamashalaıdy.
Avtory Tımýr Dúısekeev
