Aıypturaqqa bólingen 47,2 mln teńge: Túrkistan oblysynda bıýdjet qarjysynyń jumsalýy talqyǵa tústi
TÚRKІSTAN. KAZINFORM — Áleýmettik jelide Túlkibas aýdanynda aıypturaq salýǵa qarastyrylǵan 47,2 mln teńgege qatysty vıdeo tarady.
Beınejazba avtorynyń aıtýynsha, ol aýdandyq turǵyn úı-kommýnaldyq sharýashylyq bólimine baryp, bıýdjet qarajatynyń naqty qandaı maqsatqa jáne qalaı jumsalatynyn suraǵan. Sondaı-aq merdiger, smetalyq qujattar, oryndalǵan jumystar men qabyldaý aktileri týraly aqparat surap, memlekettik organ ókilderinen naqty jaýap ala almaǵanyn jetkizgen.
Osyǵan baılanysty Túlkibas aýdany ákimdigi jelide taraǵan aqparatqa túsinikteme berdi.
Ákimdik málimetinshe, qazirgi tańda memlekettik aıypturaq paıdalanýǵa berilgenge deıin kólik quraldaryn ýaqytsha ornalastyrý jáne saqtaý «Turarkent sý» MKK aýmaǵynda uıymdastyrylǵan.
Aıypturaq máselesin sheshý maqsatynda Maılykent aýyldyq okrýgi aýmaǵynan jalpy alańy 1,25 gektar jer ýchaskesi bólingen. Atalǵan jer telimi aýdan ákiminiń 2026 jylǵy 24 maýsymdaǵy qaýlysyna sáıkes Túlkibas aýdany ákimdiginiń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń «Túlkibas kórikti el» KMM-ne turaqty jer paıdalaný quqyǵymen berilgen.
— Túlkibas aýdany T.Rysqulov aýylynda aıypturaq salýǵa arnalǵan 47,2 mln teńgeniń smetalyq qujattamasy ázirlenip, 2026 jylǵy 13 mamyrda memlekettik satyp alý portalyna jarııalandy. Onyń qorytyndysy boıynsha «Qanatty Adam» múgedekter qoǵamdyq birlestigi jeńimpaz atanyp, 11 maýsymda 40,4 mln teńgege kelisimshart jasaldy, — delingen aýdan ákimdigi usynǵan málimette.
Ákimdiktiń habarlaýynsha, qazirgi ýaqytta merdiger aıypturaqtyń qurylysyn júrgizip jatyr. Nysannyń qurylysy aıaqtalmaǵandyqtan, ol qabyldanbaǵan.
— Nysan boıynsha qarajat ıgerilmegen. Joba 2027 jylǵa ótpeli nysan retinde josparlanǵan, — delingen vedomstvo jaýabynda.
Buǵan deıin Almatyda taǵy 8 myń avtoturaq orny aqyly bolatynyn habarlaǵan edik.
