Aıyptaýshy men qorǵaýshyǵa teń múmkindik berilýi kerek – mınıstr zańnamalyq ózgerister týraly
ASTANA. KAZINFORM – QR Ádilet mınıstri Azamat Esqaraev qylmystyq protsestegi advokattardyń rólin kúsheıtip, teń múmkindikter berýdi usyndy.
Búgin Májiliste «QR keıbir zańnamalyq aktilerine Qylmystyq, Qylmystyq-protsestik jáne Qylmystyq-atqarý kodeksterin ońtaılandyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylanyp jatyr.
Zań jobasynyń ekinshi bólimi qylmystyq protsestiń básekelestigin nyǵaıtýdy kózdeıdi.
«Qylmystyq protsestegi advokattardyń rólin kúsheıtý usynylady, óıtkeni qorǵaýshynyń is-áreketinde básekelestik prıntsıpin júzege asyrýdyń erekshelikteri, eń aldymen, onyń dáleldeý protsesindegi belsendiligine baılanysty bolady. Osylaısha, qazirgi ýaqytta sotqa aıyptaýshy tarap qalyptastyrǵan qylmystyq ister kelip túsedi, bul óz kezeginde sýdıalardyń is boıynsha aıyptaýǵa oı qalyptasýyna yqpal etedi», - dedi A. Esqaraev Májilistiń jalpy otyrysynda.
Mınıstrdiń aıtýynsha, sot taraptardyń óz múddelerin qorǵaýda teń múmkindikter men protsestik áreketterdi qamtamasyz etýi qajet jáne advokattarǵa aıyptaý aktisine qarama-qarsy qujatty, qorǵaý aktisin sotqa engizý quqyǵyn berýdi usyndy.
«Sondaı-aq, qylmystyq qýdalaý organdary buqaralyq aqparat quraldarynda kúdiktiniń fıgýrasyn «jamandaý» arqyly qoǵamdyq rezonans týdyratyn jáne tergeý barysyna áser etýi múmkin aqparatty jarııalaı alatyndyqtan, Zań jobasynda advokatqa sotqa deıingi tergeý málimetterin jarııalamaı, kúdiktige taǵylǵan aıypty teriske shyǵarýdy jarııalaýǵa múmkindik berý usynylady», - deıdi mınıstr.
Sondaı-aq, advokattyń róli saraptama júrgizý kezinde aıtarlyqtaı kúsheıtiledi: advokat kóshirmelerin alýǵa quqyly qujattardyń tizimi keńeıtiledi; advokattyń taǵaıyndalǵan saraptama boıynsha barlyq qosymsha jáne naqtylaıtyn suraqtary dereý sarapshyǵa jiberiledi; advokat saraptama obektilerimen tanysa alady.
Usynylǵan tásilder onyń ishinde advokattar kedergisiz jumys isteýi úshin olarǵa qylmystyq is materıaldaryn sotqa deıingi tergep-tekserý tirkelgennen bastap, sotqa joldaǵansha tolyq qatysý múmkin alý usynyldy.
«Zań jobasynda sottyń óz bastamasy boıynsha jekelegen is júrgizý áreketterin taǵaıyndaý múmkindigin boldyrmaý arqyly qylmystyq protseste taraptardyń básekelestigi artady. Bul aıyptaý men qorǵaýǵa óz talaptaryn qorǵaý jáne qarama-qarsy taraptyń talaptaryna qarsy turý úshin óz quqyqtaryn teń dárejede júzege asyrýǵa múmkindik beredi», - dedi A. Esqaraev.
Buǵan deıin Ádilet mınıstri zań jobasyndaǵy ózgeristerdiń bir bólimi azamattar men kásipkerlerdiń quqyqtaryn qorǵaýdy kúsheıtýge baǵyttalǵanyn aıtqan edi.
