Aıyppul týraly jalǵan habarlama kelse ne isteý kerek
ASTANA. KAZINFORM — Polıtsııa aıyppul týraly jalǵan habarlamalarǵa senbeýge shaqyrady, dep habarlaıdy QR Іshki ister mınıstrliginiń baspasóz qyzmeti.
Sońǵy ýaqytta turǵyndardyń uıaly telefondaryna «QR Jol polıtsııasy departamenti» ataýymen ákimshilik aıyppuldardyń bar ekendigi týraly kúmándi SMS-habarlamalar jıi joldanyp jatyr.
Polıtsııa bul habarlamalardyń alaıaqtar tarapynan azamattardy aldap, jeke derekterin ıemdený jáne aqsha qarajatyn jymqyrý maqsatynda taratylyp jatqanyn eskertedi.
— Habarlamalarda kóbine belgisiz ınternet-siltemeler kórsetilip, sol arqyly turǵyndardyń jeke málimetterine qol jetkizý áreketteri jasalady. Osyǵan baılanysty azamattardy saq bolýǵa, kúmándi siltemelerge ótpeýge jáne bógde saıttarǵa jeke derekter men bank kartalarynyń málimetterin engizbeýge shaqyramyz, — deıdi tártip saqshylary.
Ákimshilik aıyppuldardyń bar-joǵyn tek resmı aqparat kózderi arqyly ǵana tekserý qajet:
— qamqor.gov.kz,
— eGov.kz,
— sondaı-aq ekinshi deńgeıli bankterdiń mobıldi qosymshalary arqyly.
Polıtsııa turǵyndardy qyraǵylyq tanytyp, ınternet-alaıaqtardyń arbaýyna túspeýge shaqyrady.
Budan buryn ІІM áleýmettik jeliler men messendjerlerdegi akkaýnttardy úshinshi tulǵalarǵa berý faktileri týraly málimdedi.
