Aıyppul tabysymyzǵa týra kele me, joq pa degen suraq bolmaý kerek – Tamara Dúısenova

ASTANA. KAZINFORM – Premer-mınıstrdiń orynbasary Tamara Dúısenova Úkimet otyrysynan keıin ótken baspasóz máslıhatynda aıyppuldar mólsherlemesi men halyq tabysynyń arasyndaǵy balans týraly pikir bildirdi.

- Qazaqstanda aıyppul mólsheri halyqtyń tabysyna proportsıonaldy emes degen pikir kóp. Quqyq qorǵaý organdary osy aıyppuldardy belgilegende sizdermen aqyldasa ma? Aıyppul mólsheri halyqtyń tabysyna saı ádiletti dep oılaısyz ba ?, – dep surady BAQ ókili.

Vıtse-premer ondaı suraqtyń ózi orynsyz dep esepteıtinin aıtty.

- Eger azamattar zańdy buzbasa, eshkim eshkimniń qaltasyna túspeıdi. Sondyqtan, aıyppul bizdiń tabysymyzǵa týra kele me, joq pa degen suraqty qoımaý kerek. Menińshe, biz «zańdy buzbaýymyz kerek» dep suraq qoıý kerek shyǵar. Bizdiń alǵa qoıǵan maqsatymyz – zańdy buzyp, aıyppuldyń kólemin anyqtaý emes qoı, - dedi ol.

Tamara Dúısenova aıyppul elde zańnyń saqtalýy úshin qoldanylatyn shara ekenin eske saldy.

- Bizdiń aıyppuldar ne úshin salynady? Birinshiden, qoǵamdyq qaýipsizdikti nemese jol qaýipsizdigin saqtaý úshin, ulttyq qaýipsizdik saqtaý úshin salynady. Eger osy máseleler boıynsha zańdy tyńdaıtyn azamat bolsaq, bizge eshkim eshqandaı aıyppul salmaıdy. Aıyppul bizdiń tabysymyzǵa týra kelý kerek, kelmeý degen másele durys emes. Salyqqa keler bolsa, ol bizdiń tabysqa baılanysty bolady. Sebebi tabystyń 90 paıyzyn salyqqa bere almaımyz ǵoı. Ózimiz ósýimiz kerek, – dedi vıtse-premer.

Eske salsaq, 22 jeltoqsanda Semeılik muǵalim shyrsha bezendirý kezinde jaraqat alǵany málim bolǵan.