Aıyna 500-600 myń teńge: Eńbek vıtse-mınıstri otbasynyń shyǵyndaryn jarııalady

ASTANA. KAZINFORM — QR Eńbek jáne halyqty áleýmettik qorǵaý birinshi vıtse-mınıstri Asqarbek Ertaev aı saıyn óz otbasyn asyraýǵa qansha qarajat jumsalatynyn aıtty.

- Menimen birge turatyn tórt balam bar, olardyń ekeýi kámeletke tolǵan jáne qazir jumys istep júr. Al qalǵan ekeýine zaıybym ekeýimiz qarap júrmiz. Áıelim jumys istemeıdi, sebebi kenje ulym úsh jasta, balabaqshaǵa barady. Orta eseppen 500-600 myń teńge jumsaımyz. Buǵan balabaqsha aqysy, sondaı-aq qyzymnyń úıirmelerine jumsalatyn qarajat jáne otbasymyzdyń ózge de shyǵyndary kiredi, - dedi A. Ertaev Senatta tilshiler suraǵyna jaýap bere otyryp.

Sonymen qatar vıtse-mınıstr óziniń jalaqysyna qatysty naqty málimetti jarııalamady.

- Jalaqymyz Úkimet qaýlysymen retteledi jáne «qyzmet babynda paıdalaný» sanatyndaǵy (taratylýy shektelgen) aqparatqa jatady. Eger hat túrinde suraý salsańyz, onda jazbasha jaýap beremin, - dedi ol.

Budan buryn habarlanǵandaı, búgin Senattyń jalpy otyrysynda «Damýshy elderdi erekshe eskere otyryp, eń tómen jalaqyny belgileý týraly konventsııany (131-konventsııa) ratıfıkatsııalaý týraly» Zańy maquldandy.