Aıgúl Soloveva: Úkimettik emes sektor retinde saılaýǵa táýelsiz baǵa berýimiz kerek

NUR-SULTAN. QazAqparat – Úkimettik emes sektor saılaýǵa táýelsiz baǵa berýi kerek. Sybaılas jemqorlyqqa qarsy is-qımyl agenttigi janyndaǵy arnaıy monıtorıng tobynyń basshysy Aıgúl Soloveva aldaǵy saılaý jaıly osylaı dedi, dep habarlaıdy QazAqparat tilshisi.

«Úkimettik emes uıymdar táýelsiz baıqaý júrgizetin Beıpartııalyq saılaýdy baıqaý ortalyǵyn ashty. Sol sebepti protsedýra boıynsha biz saılaýǵa keletin azamattarmen kezdesýimiz kerek. Bárimiz de saılaý protsesine qatysýshymyz. Bizdiń mindet – saılaýǵa bara jatqanyn partııalardyń quramyn anyqtaý. Álbette qaı partııadan qansha adamnyń úmitker retinde túsetinin bilemiz. Alaıda onyń quramy qanshalyqty sapaly, qansha áıel men jastar bar, olardyń baǵdarlamalary qandaı, olardyń senimdi ókilderi kim – osynyń bárin bilgimiz keledi», - dedi Aıgúl Soloveva tilshilermen Beıpartııalyq saılaýdy baıqaý ortalyǵynda ótken kezdesýde.

Ol óz jarııa etken hartııada barlyq saıası kúshtermen birge jumys júrgizý týraly arnaıy pýnkt baryn aıtyp ótti.

«Buǵan deıin Beıpartııalyq saılaýdy baıqaý ortalyǵy Adal partııasynyń múshelerimen, keshe «Aýyl» partııasynyń múshelerimen kezdesti. Endi búgin taǵy úsh partııamen kezdesý ótkizemiz. Biz partııalardyń protsesterin baqylap, olarǵa monıtorıng júrgizemiz. Máselen, belgili bir partııa ekinshi partııaǵa qatysty tártip nemese ereje buzsa, Beıpartııalyq saılaýdy baıqaý ortalyǵy onyń bárin tirkep otyrýy tıis. Sebebi onyń nátıjesi boıynsha biz esep ázirleımiz. Biz úkimettik emes sektor retinde saılaýǵa táýelsiz baǵa berýimiz kerek», - dedi ol.

Eske sala ketsek buǵan deıin Aıgúl Soloveva Saılaýdy ádil jáne adal baqylaý týraly hartııa nusqasyn jarııa etken bolatyn.