Aıgúl Soloveva: Prezıdent ekologııa máselesin júıeli túrde sheshýdi tapsyrdy
«Meniń oıymsha, bul – durys ári ýaqtyly kóterilgen problema. Prezıdent eldegi ekologııalyq problemalardy sheshýdiń mańyzdylyǵyna basymdyq berip otyr. Birinshiden bul bizdiń dástúrmen baılanysty. Kóshpeli halyq qashan da tabıǵatpen bite qaınasyp, úndesip ómir súrgen. Ekinshiden pandemııa kezeńinde pnevmonııanyń órship ketýine ult ımmýnıtetiniń, adamdardyń tynys joldarynyń álsireýi ózindik áserin tıgizdi. Sebebi biz ekologııany ylǵı eń sońǵy kezekke ysyryp, qarap keldik. Zııandy zattar ókpege túsip, ony jegideı jep, ımmýnıtetti álsiretetinin eskere bermedik», - deıdi Ekologııalyq uıymdar qaýymdastyǵynyń tóraǵasy.
Aıgúl Soloveva Prezıdenttiń jyl saıyn 5 mln tonnaǵa jýyq turmystyq qatty qaldyq jınalatynyn, olardyń 15 paıyzy ǵana óńdeletinin aıtqanyn eske saldy.
«Jerimiz keń bolǵandyqtan qoqysty betaldy shasha beremiz desek, ońbaı qateleskenimiz. Adamdardyń kózi ushyp júrgen paketterge, lastanǵan aınalaǵa úırenip qalady. Al qylmystyń bári bala kezde tereze shaǵýdan bastalatynyn umytpaıyq. Munda da sol. Aınaladaǵy qoqysty kórgen adam tazalyq mádenıeti men tártipti, dástúrin umytady. Artynsha mundaı qaldyqtar, synap shamdar men tamaq qaldyqtar shirip, qaýipti zattardy, onyń ishinde metandy bóle bastaıdy. Osynyń bári ekologııany odan ary kúrdelendire túsedi», - deıdi ol.
Aıgúl Soloveva elde turaqty túrde tal egý aktsııalary uıymdastyrylyp turǵanymen aǵashty esepsiz kesý de toqtamaı turǵanyn jetkizdi.
«Sol sebepti ekologııalyq mádenıetti balaǵa kishkentaı kezinen sińirý kerek. Ózim aǵashty kesý – tiri aǵzany óltirýmen para-par dep esepteımin. Prezıdent ekologııa máselesin júıeli túrde sheshýdi tapsyrdy. Men ol mindetterdiń bárin oryndalýy tıis tapsyrma retinde qabyldaımyn», - dedi ol.
Eske sala ketsek 10 shildede ótken Úkimettiń keńeıtilgen otyrysynda Memleket basshysy Qasym-Jomart Toqaev ıtbalyqtardy taıaqpen, taspen uryp júrgen vıdeony kórgenin aıtqan bolatyn. Prezıdent osyǵan oraı Bilim jáne ǵylym mınıstri Ashat Aımaǵambetovqa balalardy qorshaǵan ortany qorǵaýǵa tárbıeleý isine basa mán berýdi tapsyrdy. Sondaı-aq Prezıdent mektep baǵdarlamasyna «Balalardyń ekologııalyq bilimi» atty jańa pán engizýdi tapsyrdy.
