Aıgúl Shaıymova stýdentterdi jemqorlyqsyz bilim alýǵa shaqyrdy
TARAZ. QazAqparat - Búgin Taraz memlekettik pedagogıkalyq ýnıversıtetinde Stýdentterge qyzmet kórsetý ortalyǵy ashyldy, dep habarlaıdy «QazAqparat» HAA tilshisi.
Eske sala keteıik, aımaq boıynsha jumys saparynyń barysynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova men QR Bilim jáne ǵylym vıtse-mınıstri Bıbigúl Asylova Taraz memlekettik pedagogıkalyq ýnıversıtetine (TarMPÝ) bardy.
Ýnıversıtettiń Stýdentterge qyzmet kórsetý ortalyǵy «Tsıfrly Qazaqstan» memlekettik baǵdarlamasyn iske asyrý aıasynda ashylyp, «bir tereze» qaǵıdasy boıynsha jumys istep otyr. Endi stýdentter úshin anyqtamalar men qujattardy alý ýaqyty qysqardy. Ol úshin barlyq qajetti tehnıkalyq jabdyqtar bar, protsess avtomattandyrylǵan. Ortalyqta ótinish bildirýshiniń memlekettik qyzmetti atqarýshymen tikeleı baılanysy joq («bir tereze» qaǵıdasy, elektrondyq ótinim, anyqtama daıyn bolǵany týraly elektrondyq habarlandyrý, elektrondyq kezek). Sondyqtan jemqorlyq qaýpi joq.
Aqparattyq termınaldarda joǵary jáne joǵary bilim alǵannan keıin memlekettik qyzmetterdiń standarttary men ýaqyt tártibi týraly barlyq aqparat bar, ýnıversıtet kórsetetin qyzmet túrleri usynylǵan. Qajetti anyqtamany alý úshin ótinim berýge bolatyn qyzmetti tirkeý sektory jumys isteıdi. «EGov -elektrondyq úkimet» óz-ózine qyzmet kórsetý sektory bar. Elektrondyq tsıfrly qoltańbasy bar stýdent nemese ýnıversıtettiń qyzmetkeri Ortalyq mamandarynyń kómegimen ótinimdi rásimdep, sol jerden daıyn anyqtamany basyp shyǵara alady, dep túsindirdi QR Memlekettik qyzmeti isteri jáne sybaılas jemqorlyqqa qarsy is-qımyl agenttiginiń Jambyl oblysyndaǵy departamentinen.
«Biz joǵary tehnologııalar, tsıfrlandyrý ǵasyrynda ómir súrip jatyrmyz. Kezinde qujattar úshin dekanatqa júgiretinbiz. Qazirgi kezde bári tsıfrly formatta, kýáligińizdi alyp baryp, qalaǵan anyqtamany alýyńyzǵa bolady. Búkil álem damýdyń jańa kezeńinde, álemdik qaýymdastyq aldynda jahandaný, tórtinshi ónerkásiptik revolıýtsııasy tur, ýaqyt óte kele, bular birqatar mamandyqtardyń joıylýyna ákeledi. Buǵan basty qundylyq - adamı kapıtaly bolatyn básekege qabiletti ult jaýap bolýy tıis. Bilim - bolashaqta tabysqa jetýdiń irgetasy. Búginde «bilim almasaq bolady, bárin aqshaǵa satyp alamyz» stereotıpi joıylǵan. Qundylyqtar júıesinde bilimdilik basty orynda bolýy kerek, bul jaǵdaıda ult tabysqa jetedi», - dedi stýdenttermen kezdesý barysynda A.Shaıymova.
Jastarmen erkin dıalog formatynda ótken kezdesýge Tarazdaǵy JOO-nyń 300 stýdenti, jastar qoǵamdyq birlestikteri men «Jas Otan» jastar qanatynyń ókilderi qatysty. Kezdesýdiń moderatory M.-H.Dýlatı atyndaǵy Taraz memlekettik ýnıversıtetiniń (TarMÝ) rektory Mahmetqalı Sarybekov boldy. Memleket basshysy jarııalaǵan «Jastar jylyn» iske asyrýdyń basymdyq mindetteri, bilim salasynda jemqorlyq oqıǵalaryna qarsy is-qımyldaǵy jastardyń róli, qazaqstandyq jastardyń jan-jaqty damýy talqylandy.
