Aıgúl Shaıymova: Kótermeleýdiń jańa júıesi barlyq memqyzmetshilerge bonýs bólýdi qarastyrady
«Qazirgi tańda syıaqy berý máselesi - memlekettik organnyń únemdelgen qarajatynyń bar-joǵyna tikeleı baılanysty. Alaıda bul ádis jigerlendirý máselesine kelgende belgili bir teńgerimsizdikti (dısbalansty) qalyptastyryp otyr», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova agenttikte ótken baspasóz máslıhatynda.
Agenttik tóraǵasynyń orynbasary atap ótkendeı, aýyldyq jáne aýdandyq deńgeıde osynaý teńgerimsizdik aıqyn kórinedi.
«Jańa júıe boıynsha jaǵdaıdyń teńsizdigi alynyp tastalady. Sebebi, bonýs árbir memlekettik qyzmetshige beriledi. Jalpy, baldyq shkala boıynsha, bonýstar eń aldymen qyzmettik mindettemeni oryndaýda tıimdilik pen jaýapkershiliktiń kúsheıtýdi kózdeıdi. Oǵan mysal retinde joǵaryda atalǵan faktorlardy atap ótýge bolady. Ekinshiden, bul amal-ádis memlekettik qyzmettiń sapaly quramyna shoǵyrlandyrýǵa kómektesedi», - deıdi Aıgúl Shaıymova.
Eske sala ketsek buǵan deıin Aıgúl Shaıymova Agenttikte mereke kezinde bárine birdeı syıaqy berý júıesinen bas tartyp, jumysy nátıjeli qyzmetkerler úshin qosymsha syıaqy bonýstaryn bólý júıesin engizilgenin málim etken bolatyn.
