Aıgúl Saılybaevanyń ólimine qatysty is: ІІM jańa málimetterdi jarııalady
ASTANA. KAZINFORM — QR Іshki ister mınıstrliginiń baspasóz qyzmeti qazaqstandyq eks-sýdıa Aıgúl Saılybaevanyń ólimine qatysty qylmystyq is boıynsha jańa málimetter berdi.
Vedomstvonyń agenttiktiń resmı saýalyna joldaǵan jaýabynda atalǵan kúdiktilerge qatysty Jetisý oblysy Taldyqorǵan qalalyq polıtsııa basqarmasy QR Qylmystyq kodeksiniń 110-babynyń 2-bóligi («Azaptaý») boıynsha sotqa deıingi tergep-tekserý júrgizip jatqany aıtylǵan.
— Sottyń sanktsııasymen atalǵan tulǵalarǵa syrttaı qamaýda ustaý túrindegi bultartpaý sharasy qoldanylyp, keıin halyqaralyq izdeý jarııalandy, — delingen ІІM jaýabynda.
Sondaı-aq mınıstrliktiń baspasóz qyzmeti Aıgúl Saılybaevaǵa qatysty azaptaý áreketteri Taldyqorǵan qalasynyń aýmaǵynda jasalǵanyn naqtylady. Óıtkeni kúdiktiler men marqum buǵan deıin osy qalada turǵan.
Vedomstvo ókilderiniń málimetinshe, qylmystyq is boıynsha tergeý múddesine baılanysty ózge aqparat jarııa etilmeıdi.
Buǵan deıin Darmshtadt qalasynyń aǵa prokýrory agenttiktiń resmı saýalyna bergen jaýabynda búgingi kúnge deıin Germanııa Federatıvtik Respýblıkasynyń aýmaǵynda da, odan tys jerlerde de atalǵan iske baılanysty eshkimniń ustalǵany tirkelmegenin málimdedi.
Sonymen qatar advokat Janna Ýrazbahova Dontsovtardyń ustalǵany týraly taraǵan aqparatty joqqa shyǵardy.
Aıta keteıik, Reseıde Germanııada kisi qolynan qaza tapqan Aıgúl Saılybaevaǵa qatysty tekserý bastaldy.
