Aıgúl Saılybaeva isi: advokat kúdiktilerdiń ustalǵany týraly aqparatty joqqa shyǵardy
ASTANA.KAZINFORM — Burynǵy qazaqstandyq sýdıa Aıgúl Saılybaevany óltirdi degen kúdikke ilingen Aleksandr jáne Natalıa Dontsovtar áli ustalǵan joq.
Buǵan deıin birqatar buqaralyq aqparat quraldarynda Aleksandr men Natalıa Dontsovtardyń Reseıde ustalǵany týraly habar taraǵan bolatyn.
— Aqparat shyndyqqa sáıkes kelmeıdi. Dontsovtar rasynda ustalǵan, alaıda bul 2025 jyldyń jeltoqsan aıynyń sońynda bolǵan. Olar Qazaqstannyń izdestirý isi boıynsha jeke basyn jáne turǵylyqty mekenjaıyn anyqtaý maqsatynda polıtsııa bólimshesine jetkizilgen, — dedi advokat Janna Ýrazbahova.
Sonymen qatar advokattyń aıtýynsha, Qazaqstan Dontsovtardy azaptaý deregi boıynsha halyqaralyq izdeýge jarııalaǵan.
— Sol kezde Natalıa Dontsovanyń tegin ózgertip, qazirgi ýaqytta Vasılenko famılııasyn qoldanatyny belgili boldy, — dedi Janar Ýrazbahova.
Sondaı-aq advokat kúdiktilerdiń qazirgi protsessýaldyq mártebesine toqtaldy.
— Qazirgi ýaqytta Natalıa Eýropol jelisi arqyly Germanııanyń suraýy boıynsha izdeýde júr. Al Qazaqstannyń suraýy negizinde Interpol jelisi arqyly ekeýi de halyqaralyq izdeýge jarııalanǵan. Olardyń naqty turǵylyqty jeri belgili bolǵanymen, izdeý mártebesi saqtalyp otyr, — dedi Janna Ýrazbahova.
Advokat óz sózinde kúdiktiler Reseı Federatsııasynyń azamattary bolǵandyqtan, olardy basqa memleketterge ekstradıtsııalaý múmkin emes ekenin atap ótti.
Advokattyń málimetinshe, qazirgi tańda qorǵaý tarapy Germanııadan Aıgúl Saılybaevanyń ólimine qatysty qylmystyq istiń materıaldaryn Reseıge berýdi nemese Reseıde atalǵan derek boıynsha qylmystyq is qozǵap, ony sotqa joldaýdy talap etip otyr.
Aıta keteıik, Reseıde Germanııada kisi qolynan qaza tapqan Aıgúl Saılybaevaǵa qatysty tekserý bastaldy.
Eske sala keteıik, Іshki ister mınıstriniń orynbasary Sanjar Ádilov byltyr maýsym aıynda Germanııada kóz jumǵan eks-sýdıa Aıgúl Saılybaevanyń isine qatysty túsinik berdi.
