Aıgúl Sádýaqasova: Jańa Konstıtýtsııa tsıfrlanǵan ortanyń jastaryna quqyq kepildigin beredi
ASTANA. KAZINFORM — Fılosofııa, saıasattaný jáne din taný ınstıtýtynyń basshysy Aıgúl Sádýaqasova Konstıtýtsııalyq reforma jónindegi komıssııanyń búgingi otyrysynda Ata zańnyń jańa nusqasy jastarǵa ne beretinin aıtty.
— Qazir Qazaqstan demografııalyq órleýdi bastan keship jatyr. Azamattardyń 30 paıyzdan astamyn balalar men jastar qurap otyr. Al álemde adamı kapıtaldyń sapasy ekonomıkanyń, áleýmettik salanyń jáne qundylyqtar júıesiniń damýyn anyqtaıtyn faktorǵa aınaldy. Búkil álemde shyǵarmashylyq jáne qalyptan tys oılaıtyn jastardyń zeıinine talas júrip jatyr. Bul tendentsııa jańa áleýmettik sharttar qalyptastyra bastady. Aqparat dáýiri jasandy ıntellektini ǵana emes, odan týyndaıtyn jańa qıyndyqtar men táýekelderdi týdyrdy, — dedi ǵalym.
Instıtýt basshysy jańa Konstıtýtsııa jas býyn keıin betpe-bet keletin máselelerdi qamtyǵanyn aıtady.
— Konstıtýtsııanyń jańa redaktsııasy qazaqstandyqtardyń jańa býyny úshin tsıfrlanǵan ortadaǵy quqyq kepildigi, derbes derekterdiń qaýipsizdigi, elektrondyq kommýnıkatsııa men jeke ómirge qol suqpaý turǵysynan erekshe mańyzdy. Bul krıterııler jańa býynǵa jeke shekara, zorlyq-zombylyqtan bas tartý, tańdaý basymdyǵy, salaýatty ómir salty men taza orta sııaqty ómir sapasyn qalyptastyratyn qundylyqtardy qamtamasyz etedi, — dedi Aıgúl Sádýaqasova.
Aıta keteıik, Kazinform agenttiginiń qazaq jáne orys tilindegi Telegram arnasy osy otyrystan mátin translıatsııasyn berip jatyr.
