Aıgúl Quspan Prezıdenttiń EAEO-daǵy sózi jaıly: Ekonomıkalyq ıntegratsııa qajettigin sheber jetkizdi

ASTANA. QazAqparat – Jibek Joly telearnasynyń «JJ Talk» baǵdarlamasynda qonaqta bolǵan Májilis depýtaty Aıgúl Quspan Prezıdent Qasym-Jomart Toqaevtyń Eýrazııalyq ekonomıkalyq odaq keńesinde sóılegen sózindegi basty messedjderdi atady, dep habarlaıdy QazAqparat tilshisi.

«Qazaqstanǵa tek ekonomıkalyq ıntegratsııa qajet. Bizdiń Prezıdent sheber dıplomat bolǵan soń ony ádepti, sypaıy túrde jetkizdi. Ony sonda otyrǵan adamdardyń barlyǵy túsindi dep oılaımyn. Bul áńgime jaı aıtylǵan joq. Birneshe reseılik sheneýlik bir parlament quraıyq, ortaq valıýta bolsyn degen bastama kóterip júrdi. Onyń barlyǵy – saıasat. Al, Memleket basshysy Qasym-Jomart Toqaevtyń aıtqany tek ekonomıkalyq ıntegratsııa tóńireginde boldy. Biraq, bul oraıda bir másele aıtyldy, ol – osy bes memlekettiń ishinde eki el bólek, tereń ıntegratsııaǵa ótip kele jatyr», - dep pikir bildirdi Aıgúl Quspan.

Májilis depýtaty atalǵan odaqqa múshe barlyq el ekonomıkalyq turǵydan teń damýy mańyzdy ekenin atap ótti.

«Máselen, bizdiń dúkenderde Reseıden kelgen taýarlar tolyp jatyr. Al, bizdiń ónimderimiz ol eldiń naryǵynda joq. Sonymen qatar, qazaqstandyqtar jumys isteý úshin Reseıge barady. Degenmen, ol elden bizge qyzmet etýge keletinder joq. Árıne, bul oraıda mobılızatsııa kezeńin esepke alyp otyrǵan joqpyn. Sondyqtan, osyndaı jáne ózge de másele kóp. Ony sheshýdi qolǵa alýymyz qajet. Prezıdent sózindegi negizgi messedj osy boldy dep esepteımin», - dep túıindedi depýtat.

Aıgúl Quspannyń oıy Eýrazııalyq ekonomıkalyq odaqqa múshe elder birlesip, tek ekonomıkalyq ilgerileý baǵytynda júrýi tıis degenge saıady. Onyń paıymynsha, bul uıym tóńireginde saıası múdde bolmaýy qajet.