Aıgúl Qapbarova: Investıtsııalyq tabystyń teń jartysy balalardyń shotyna aýdarylyp, dollarmen saqtalady

ASTANA. KAZINFORM - Senat depýtaty Aıgúl Qapbarova Ulttyq qordan balalarǵa bólinetin qarjy týraly Facebook áleýmettik jelisindegi paraqshasynda óz oılaryn ortaǵa saldy

"Memleket basshysynyń tabıǵı resýrsty ádil bólý jónindegi bastamasynan soń «Ulttyq qor – balalarǵa» baǵdarlamasy zańnamalyq turǵyda bekip, júzege asa bastady. 2024 jyly Ulttyq qordan osy maqsatqa bólingen qarajattyń somasy – 695 mıllıon dollar. Osy somany elimizdegi 6 mıllıon 919 myń 131 balaǵa bólgende 100 dollar 50 tsentten alǵashqy tólem tústi.

Bıyldan bastap Ulttyq qorǵa túsetin ınvestıtsııalyq tabystyń teń jartysy balalardyń shotyna aýdarylyp, dollarmen saqtalady.

Bala 18 jasqa tolǵannan keıin jınaqtardy eki maqsatqa - turǵyn úı jaǵdaılaryn jaqsartýǵa jáne (nemese) bilim alýǵa paıdalanady", - dep jazdy senator.

Senat spıkeri Máýlen Áshimbaev búgin jýrnalısterge bergen suhbatynda Ulttyq qordan balalarǵa túsip jatqan tólem kólemi boıynsha túsinikteme jasady.

- Biz jyl ótken saıyn Ulttyq qor qarajatyn kóbeıtýge jáne únemdeýge múddeli bolýymyz kerek. Sonda balalarǵa baǵyttalǵan ınvestıtsııalyq tabys kólemi de arta túsedi , - dep atap ótti ol.