Aıgúl Abjalıeva, 4 balanyń anasy: Alǵashqy áleýmettik kómekti qyzymyzdyń otasyna jumsaımyz

NUR-SULTAN. QazAqparat - Astanalyq kópbalaly ana Aıgúl Abjalıeva 4 balaǵa 97800 teńge ataýly áleýmettik kómek alǵan. Bir balasy naýqas otbasyǵa qalalyq ákimdik arnaıy jataqhana da usynypty, dep habarlaıdy QazAqparat tilshisi.

Aıgúl Turarqyzynyń aıtýynsha, úıdiń otaǵasy turaqty jumysta joq. Al 4 balanyń birine ota jasaý qajet. Jańartylǵan formattaǵy ataýly áleýmettik kómek osyndaı qıyn sátte kópbalaly otbasyǵa úlken demeý bolǵan.

«Qyzymyzdy Almatyǵa otaǵa aparý kerek. Sonyń jolyna qarajatty qaıdan alamyz dep júr edik. 29 sáýirde alǵashqy áleýmettik kómek qolymyzǵa tıdi. 97800 teńgeni sol ota shyǵyndaryna jumsaımyz» - deıdi astanalyq ana.

Nur-Sultan qalasynyń ákimdigi atalmysh januıada naýqas bala bar ekenin bilgennen keıin aqysyz negizde jataqhana usynypty.

«Astanaǵa kelgenimizge bıyl 9 jyl bolady. Qyzymyz naýqasqa shaldyqqanda qala ákimdigi arnaıy jataqhanaǵa ornalastyrǵan. Qazir sonda turyp jatyrmyz. Tek kommýnaldyq qyzmet aqysyn ǵana tóleımiz. Jataqhanamyz jaıly. Ońasha dárethana men jýynatyn bólmesi de bar», - deıdi Aıgúl Abjalıeva.

Sáýir aıynyń sońynda elordalyq kópbalaly otbasylarǵa ataýly áleýmettik kómek tólene bastaǵanyn habarlaǵanbyz.