Áıgili Rolling Stone jýrnaly Dımashtyń halyqaralyq bedeldi syılyqty qalaı alǵanyn jazdy

ASTANA. KAZINFORM - 17 aqpanda eń tanymal basylymdardyń biri ROLLING STONE qazaqstandyq mýzykant týraly «Dımash Qudaıbergen DIAFA 2024 syılyǵyna mýzyka salasyndaǵy jahandyq yqpaly úshin ıe boldy» degen materıal jarııalady.

Maqala avtory 2024 jyldyń qarasha aıynda Dýbaıda ótken bedeldi halyqaralyq Arab Festivals Awards (DIAFA) marapattaý rásimi týraly baıandap, onyń laýreattary arasynda tanymal qazaqstandyq ánshi Dımash Qudaıbergen de bolǵanyn baıandaıdy.

- DIAFA-da Dımashtyń marapaty úlken mańyzǵa ıe. Ol osy syılyqty jeńip alǵan alǵashqy Ortalyq Azııa ártisi bolǵandyqtan, Álemdik kóshbasshylardyń kórnekti tizimine endi. Ártúrli saladaǵy 25 jýrnalısten turatyn komıtet ótkizetin qatań irikteýimen tanymal DIAFA óz salalary men qaýymdastyqtarynyń damýyna aıtarlyqtaı úles qosqan adamdardy atap ótti.

Saltanatty rásim barysynda Dımash óziniń jalǵasyp jatqan álemdik týrynyń tıtýldyq áni «Stranger» ánin oryndady. Onyń klassıkalyq, pop jáne dástúrli qazaq elementteri biriktirilgen qoıylymy kórermenderdi baýrap aldy. Júrgizýshiler ony mádenı jáne mýzykalyq shekaralardan ótý qabiletine basa nazar aýdara otyryp, «shekarany bilmeıtin daýysy bar erekshe talant» retinde usyndy, - delingen maqalada.

Avtordyń paıymynsha, Dımashtyń DIAFA-ǵa qatysýy onyń mýzykasy tildik jáne mádenı kedergilerdi eńserý arqyly búkil álemde rezonans týdyratynyn kórsetti. Ánshi 14-ten astam tilde sóılep, búkil Eýropa men Azııa boıynsha zaldardy tolyq jınaı otyryp, Qazaqstannan tys jerlerde óz Otanynyń mádenıetin tanystyrýdy jalǵastyrýda.

ROLLING STONE – mýzyka men pop-mádenıetke arnalǵan amerıkayq jýrnal. 1967 jyly San-Frantsıskoda negizi qalanǵan.

Dımashtyń BAÁ-degi jumysyna arnalǵan maqala ROLLING STONE MENA (Taıaý Shyǵys jáne Soltústik Afrıka) basylymynda jarııalandy, ol Taıaý Shyǵys pen Soltústik Afrıkanyń jıyrmadan astam elin qamtıdy.

Aıta keteıik, Dımash Qudaıbergen jańa ániniń premerasyn jarııalady.