Áıgili modeler Djordjo Armanı dúnıeden ótti
ASTANA. KAZINFORM — Italıandyq modeler 92 jasynda ómirden ozdy. Bul týraly La Repubblica gazeti habarlady, dep TASS agenttigi jazdy.
11 shildede ol 91 jasqa tolǵan bolatyn. Sońǵy kezderi «sán áleminiń patshasy» atanǵan Armanıdiń densaýlyǵy nasharlap bara jatqany týraly málimetter taraǵan edi.
1975 jyly negizi qalanǵan onyń sán úıi úlken holdıngterge enbegen sanaýly kompanııalardyń biri boldy.
Al BıznesOnline basylymynyń habarlaýynsha, modelermen qoshtasý rásimi Mılanda, Teatro Armani teatrynda ótedi. Sońǵy saparǵa shyǵaryp salý rásimine qatysqysy keletinder 6 jáne 7 qyrkúıek kúnderi bara alady. Jerleý rásimi Armanıdiń ózi qalaǵandaı jaqyn-jýyǵynyń arasynda uıymdastyrylmaq.
Basylym La Repubblica kompanııanyń habarlamasyna silteme jasap: «Armanı myrza, qyzmetkerleri men seriktesteri árdaıym qurmet pen tańǵalyspen ataǵan, jaqyndarynyń qorshaýynda tynyshtyqpen baqılyq boldy. Ol sońǵy demi qalǵansha jumys istedi, kompanııaǵa, onyń kollektsııalaryna jáne árdaıym ózgerip turatyn jobalaryna bar kúsh-jigerin arnady» dep jazdy.
Djordjo Armanı 1934 jyly Soltústik Italııadaǵy Pıachentsa qalasynda dúnıege kelgen. 1953-1955 jyldary Mılan ýnıversıtetiniń medıtsına fakýltetinde bilim alǵan. 1964 jyly Nino Cerruti sán úıinde jumysqa ornalasyp, kıim tigý tehnıkasyn meńgerip, 1970 jylǵa deıin Hitman erler kıimderiniń dızaıneri boldy.
1974 jyly alǵash ret óziniń esimimen kollektsııasyn tanystyrdy, al bir jyldan keıin dosy, sáýletshi Serdjo Galeottı keńesimen Giorgio Armani S.p.A kompanııasyn qurdy. Galeottı brendtiń qarjylyq basqarýyn óz moınyna alyp, Armanı shyǵarmashylyqqa tolyǵymen shoǵyrlana aldy.
Olardyń basshylyǵymen Giorgio Armani USA, Emporio Armani jáne Armani Jeans sııaqty kýlttik bólimsheler quryldy, bul joǵary sándi kópshilikke qoljetimdi etti. Armanı ımperııasynyń ereksheligi — onyń táýelsizdigi boldy: brend eshqashan úlken lıýks holdıngterine kirmeı, otbasylyq baqylaýda qaldy. 2005 jyly ol óziniń haute couture (bıik sán) kollektsııasy — Armani Privé-di iske qosty.
Eske sala keteıik, buǵan deıin AQSh-ta «Álemdegi eń meıirimdi sýdıa» qaıtys bolǵan edi.