Áıgili Lývr murajaıy tonalǵannan keıin qaıta ashyldy

ASTANA.KAZINFORM - Parıjdegi áıgili Lývr murajaıyndaǵy atyshýly urlyqtan úsh kún ótken soń murajaı qaıta ashyldy, dep habarlaıdy Kazinform agenttiginiń menshikti tilshisi.

Tańerteńniń ózinde birneshe týrıst murajaıdyń ashylýyn kútip, pıramıdanyń janynda turdy, dep jazady Le Parisien.

Al oqıǵadan keıin eshbir málimdeme jasamaǵan Lývr murajaıynyń prezıdenti jáne dırektory Lorans de Kar sársenbi kúni saǵat 16:30-da Senattyń Mádenıet komıtetinde suraqtarǵa jaýap beredi.

Ol tonaýǵa qatysty oqıǵalardyń qalaı órbigenin baıandaıdy. Sondaı-aq ol murajaıdyń qurylymdyq qaýipsizdiginiń jaı-kúıi týraly suraqtarǵa jaýap beredi.

Buǵan deıin Frantsııanyń Esep palatasy murajaıdyń úshten bir bóligin qamtıtyn beınebaqylaý kamerasy joq ekenin eskertken.

Esterińizge sala keteıik, ótken jeksenbide tórt belgisiz adam ataqty murajaıdyń «Apollon» galereıasyndaǵy eki vıtrınadan tergeýshiler quny 88 mıllıon eýroǵa baǵalaǵan segiz baǵa jetpes áshekeı buıymdardy urlap ketken bolatyn.

Frantsııa prezıdenti Emmanıýel Makron Lývrdaǵy zergerlik buıymdardyń urlanǵanyna jaýap berip, olardyń qaıtarylyp, kináliler jaýapqa tartylatynyn aıtty.