Áıgili «Lılo jáne Stıch» qazaqsha sóıleıdi

ASTANA. KAZINFORM — Mamyr aıynda áıgili «Lılo jáne Stıch» anımatsııalyq fılmi qazaq tilinde kórsetile bastaıdy, dep habarlaıdy Jibek Joly telearnasy.

Dısneı stýdııasynyń týyndysyn kórermender kınoteatrlardan kóre alady.

Al jeltoqsanda qazaqstandyqtardy taǵy bir aýqymdy premera kútip tur. «Avatardyń» úshinshi bólimi túpnusqamen qatar kórsetiledi dep josparlanǵan. 

Halyqaralyq «Qazaq tili» qoǵamynyń prezıdenti Raýan Kenjehanuly Jibek Joly telearnasynyń stýdııasyna keldi.

Onyń sózinshe, qazir úlken fılmderdiń barlyǵy derlik qazaq tilinde kórsetile bastady.

— Iá, biz úshin qazaq tilindegi mazmundy kóbeıtý baǵytyndaǵy jumystyń aýqymdy bir bóligi — bul dúnıejúzindegi álemge tanymal úlken stýdııalardyń týyndylaryn qazaq tilinde úlken kınoteatrlarda shyǵaryp kórsetý edi. Buǵan deıin belgili jylyna bir-eki fılm shyǵyp jatty. Bul Qazaqstandaǵy demeýshilerdiń kúshimen jasalyp jatqan jumys. Al ótken jyldan beri biz stýdııalardy talap qoıyp, usynys berip, jaǵdaı jasap, stýdııalar óz fılmderin qazaq tiline óz qarajattary esebinen aýdaryp ákele bastady. Sony arqasynda jyl saıyn kórsetiletin fılmder 1-2 emes, úlken fılmderdiń barlyǵy derlik qazaq tilinde kórsetile bastady. Byltyr 4 fılm kórsetildi, ol Pixar stýdııasynyń «Oıjumbaq», «Moana» degen mýltfılmi, sodan keıin «Venom», jyldyń sońynda «Mýfasa: Arystan Patshasy» degen fılm shyqty, — dedi Raýan Kenjehanuly.

Buǵan deıin Prezıdent qazaq tilinde túsirilgen mýltfılmder kóp bolýy qajet ekenin aıtqan edi.