Áıgili Dıý Soleı tsırki Astanada óner kórsetti
ASTANA. KAZINFORM – Astanadaǵy Barys Arena sahnasynda álemge áıgili du Soleil tsırkiniń OVO atty shoýy kórsetildi. Qazaqstan alǵash ret kompanııanyń eń tanymal qoıylymdarynyń biriniń álemdik gastroldik baǵytyna endi. Bul shoý 17 jyldyq tarıhynda álemniń 50-ge jýyq elinde 10 mıllıonnan astam kórermenge usynylǵan.
Janýardan bas tartqan alǵashqy tsırk
Cirque du Soleil – kóshedegi trýppadan álemdik sahna ımperııasyna aınalǵan erekshe mádenı qubylys. Onyń tarıhy 1980-jyldardyń basynda Kanadanyń Kvebek qalasynda bastaldy. Óziniń 42 jyldyq tarıhynda bul tsırk Qazaqstanǵa ekinshi ret kelip otyr. Alǵash ret áıgili ujym elimizde EXPO-2017 halyqaralyq kórmesi kezinde óner kórsetken bolatyn.
Cirque du Soleil sahnadan janýarlardy tolyq alyp tastap, tsırk ónerindegi eń iri revolıýtsııany jasady. Bul sheshim kompanııanyń bastapqy kezeńinen-aq qabyldanyp, tsırkti tek adam múmkindigine, akrobatıka men teatrlyq ónerge súıengen jańa formatqa ózgertti. Nátıjesinde olar dástúrli tsırk uǵymyn túbegeıli ózgertti. Munda klassıkalyq «nomerler tizbegi» emes, tutas sıýjettik spektakl usynylady. Osylaısha tsırk óz baǵdarlamasynda bı, teatr, akrobatıka, jandy mýzykany toǵystyryp, «trıýkterdi kórý» formasynan «vızýaldy teatrǵa» aınaldy.
Búginde kompanııanyń ataǵy álemge tarady, olardyń qoıylymdaryn álemniń 450-den astam qalasynda júzdegen mıllıon kórermen tamashalaǵan. Al Las-Vegasta Cirque du Soleil turaqty shoý qoıylymdaryn júrgizip, úlken sahnalyq ındýstrııa qurdy. Trýppanyń erekshelikteriniń biri – oryndaýshylardyń kásibı deńgeıi. Artısterdiń eleýli bóligi burynǵy sportshylar: gımnasttar, akrobattar jáne sınhrondy júzýshiler. Olar kún saıyn uzaq jattyǵýlar jasap, keıde repetıtsııa aldynda 1,5 saǵattyq qyzdyrý jattyǵýlaryn oryndaıdy.
Kompanııanyń keıbir qoıylymdarynyń bıýdjeti Gollıvýd blokbasterlerimen teńesedi. Mysaly, «KÀ» shoýynyń quny shamamen 165 mıllıon dollardy quraǵan. Sonymen qatar, barlyq spektaklde mindetti túrde jandy mýzyka oınap, avtorlyq týyndylar jazylady. Qaýipsizdik pen tehnologııa damyǵanyna qaramastan, shoýdaǵy akrobatıkalyq elementter esh saqtandyrýsyz jasalady.
Búginde kompanııada 80-nen astam ulttyń 4 myńnan astam qyzmetkeri, sonyń ishinde 1 200 ártis jumys isteıdi. 2026 jyly Cirque du Soleil bir ýaqytta 17 shoý kórsetýdi josparlap otyr.
Shoý ne týraly
Cirque du Soleil-diń eń tanymal qoıylymdarynyń biri – «OVO», ol portýgal tilinen aýdarǵanda «jumyrtqa» degen maǵynany bildiredi. Shoýdyń negizgi ıdeıasy – jumbaq jumyrtqanyń paıda bolýy arqyly jándikter álemindegi oqıǵalar men olardyń arasyndaǵy mahabbat hıkaıasyn kórsetý. Bul – jeńil, qyzyqty, otbasylyq oqıǵa, biraq tereń maǵynaǵa ıe. Kórermender az ýaqytqa shynaıy ómirden alystap, 2,5 saǵat boıy qııal-ǵajaıyp álemge enip, erekshe áser alady.
«OVO» shoýy erekshe akrobatıkalyq elementterimen tanymal. Solardyń biri – kerilgen arqandaǵy trıýk. Bul nómirde ártis ádettegideı bekitilgen qurylymda emes, alyp qozǵalmaly japyraqtyń ústinde óner kórsetti, bul qoıylymnyń kúrdeliligin birneshe ese arttyrdy.
Shoýdaǵy taǵy bir erekshe kórinisti mońǵolııalyq kontorsıonıst oryndaıdy. Ol denesin óte kúrdeli qalyptarǵa keltirip, búkil salmaǵyn tek tisi arqyly ustap turatyn trıýkter kórsetedi. Sonymen birge, japon ártisi ýltrakúlgin boıaýmen tolyq qarańǵylyqta vızýaldy áseri erekshe nómir kórsetti.
Eki saǵattyq qoıylymda kórermender kóbelekterdiń áýedegi dýetin, shegirtkelerdiń tramplın arqyly qabyrǵaǵa sekirýin jáne skarabeılerdiń áýedegi nómirin tamashalady. Munda ártister alty metrlik qashyqtyqtaǵy platformalar arasynda bir-birin laqtyryp, adam trapetsııasyna uqsas kúrdeli akrobatıkany oryndaıdy.
«OVO» qoıylymynda mýzykalyq súıemelge erekshe mán berilgen. Shoýǵa arnalǵan barlyq mýzyka arnaıy jazylǵan jáne orkestr men vokalıster jandy daýysta oryndaıdy.
Cirque du Soleil álemniń túkpir-túkpirinen ártisterdi biriktiredi. Aıta keterligi, bul qoıylymǵa 25 elden kelgen 53 ártis qatysady, olar 17 túrli tilde sóıleıdi. Olardyń arasynda Olımpıada qatysýshylary, halyqaralyq chempıondar, kásibı akrobattar, jeti adamdyq tiri mýzykalyq top, vokalıst jáne úsh kloýn bar.
Qoıylym kelissózderi 1,5 jyl júrgizilgen
Qazaqstandaǵy qoıylymdy uıymdastyrýshylar Astana men Almatyda anshlag bolady dep kútýde. Jobanyń uıymdastyrýshysy Vıktorııa Torgýnakovanyń aıtýynsha, búginge deıin shamamen 20 myń bılet satylǵan.
– Biz Almaty men Astanada barlyq kúnder boıynsha jalpy 35 myń kórermen keledi dep josparlap otyrmyz. Ár qalada jeti qoıylymnan ótedi: jumys kúnderi keshki kórsetilimder, al demalys kúnderi tańǵy, kúndizgi jáne keshki seanstar uıymdastyrylady. Ár shoýdyń syıymdylyǵy shamamen 5 myń kórermendi quraıdy – dedi V. Torgýnakova jýrnalısterge.
Ol gastroldik saparlardy uıymdastyrýǵa daıyndyq 1,5 jyldan astam ýaqytqa sozylǵanyn atap ótti.
– Búginde Astana men Almatyda tsırktiń talaptaryna tolyq sáıkes keletin eki alań bar. Aqpan aıynda biz Cirque du Soleil ınjenerlerimen birge nysandardy tekserdik. Qurylymdardyń júk kóterimdiligi, ınjenerlik júıelerdiń turaqtylyǵy, elektrmen jabdyqtaý men ınternet baılanysynyń senimdiligi tekserildi. Tek ınjenerlerdiń oń qorytyndysynan keıin ǵana shoý ótkizý jáne bılet satýdy bastaý týraly sheshim qabyldandy, – dedi uıymdastyrýshy.
Spıkerdiń aıtýynsha, Qazaqstan tarıhynda buǵan deıin mundaı aýqymdy is-shara bolǵan emes: barlyq jabdyqty, dekoratsııalardy jáne ártisterdiń sahnalyq beınesin jasaýǵa qajetti zattardy tasymaldaý úshin keminde eki júk Boeing ushaǵyn tartýǵa týra keldi.
– Biz Qazaqstanǵa 200 myń kılogramnan astam, ıaǵnı 200 tonnadan asa júk ákeldik. Barlyq kir jýý, útikteý, as ázirleý, kıim tigý qyzmetteri men jabdyqtaryn ózimizben alyp júremiz. Máselen, ushaqtardyń bireýi jartylaı as úı jabdyqtarymen toltyrylǵan. ıAǵnı, belgilengen mázir boıynsha as daıyndalady. Mundaı kúrdeli janrdaǵy ártister úshin as qorytý júıesiniń durys jumys isteýi óte mańyzdy. Ártisterge dástúrli jergilikti taǵamnan dám tatyrǵymyz kelgen, biraq olar dıeta saqtaıtyndyqtan, sypaıy túrde bas tartty. Ekinshiden, óte qatań keste bar. Óıtkeni jattyǵýlar men repetıtsııalar úzdiksiz júredi, sondyqtan bul – eń qolaıly format, – deıdi uıymdastyrýshy.
«OVO» shoýy Astanada 7 maýsymǵa deıin jalǵasady. Odan keıin alǵash ret Almatyǵa kóship, 11-14 maýsym aralyǵynda «Almaty Arenada» ótedi. Qazaqstan boıynsha jalpy 14 qoıylym josparlanǵan.
Osyǵan deıin Qazaqstanǵa áıgili Cirque du Soleil ujymy kelgeni týraly jazdyq.
