Áıgili búrkitshi qyz Aısholpan referendýmda daýys berdi
ÓSKEMEN. KAZINFORM — Shyǵys Qazaqstan oblysynda áıgili búrkitshi qyz Aısholpan Nurǵaıypqyzy referendýmda daýys berdi.
Ulan aýdany Bozanbaı aýyldyq okrýgi Bozanbaı aýylynda turatyn álemge tanymal búrkitshi qyz Aısholpan Nurǵaıypqyzy referendýmǵa qatysty. № 976 saılaý ýchaskesine kelip, óz tańdaýyn jasady.
«Prezıdent referendým ótetindigin jarııalaǵan kezde birden óz daýysymdy beremin dep sheshtim. Sol úshin búgin mine osynda kelip otyrmyn. Jalpy biz erkin oılaı alatyn, ózindik oı-pikiri bar halyqpyz ǵoı. Sondyqtan elin súıgen, memleketiniń bolashaǵyn oılaıtyn barsha azamat osyndaı mańyzdy saılaýdan qalys qalmaýy kerek dep esepteımin», — deıdi búrkitshi qyz.
Aısholpan Nurǵaıypqyzy alty jasynan bastap asaý úıretip, segiz jasynan búrkit baptaǵan. Іri halyqaralyq jarystarǵa qatysyp, eń jas búrkitshi atanǵan.
Qazaq qyzy týraly ondaǵan fılm túsirilip, jer-jahannyń túkpir-túkpirinde kórsetildi.
Qus kótergen kóp uldyń arasyndaǵy búrkitshi qyzǵa atadan qalǵan dástúrdi jalǵastyryp, ulttyq bolmysty joǵaltpas úshin qusbegilikpen aınalysýǵa ákesi Nurǵaıyp Ydyrysuly sebepker bolǵan.
Búrkitshiler otbasy kópten beri tarıhı otanyna kóshýdi maqsat etken.
Qazir ShQO-daǵy Bozanbaı aýylynda turyp jatyr.
