Áıgili amerıkalyq jýrnal Qazaqstan týrızmi týraly nusqaýlyq jarııalady
ASTANA. KAZINFORM – Qazaqstan keıingi jyldary sheteldik týrıster úshin trend baǵytqa aınaldy. Muny elimizdiń týrızmi týraly álemniń iri basylymdarynda jaryq kórip jatqan aqparattardan da baıqaýǵa bolady.
QR Týrızm jáne sport mınıstrliginiń málimetinshe, jýyrda amerıkalyq áıgili Travel+Leisure jýrnalynyń Ońtústik-Shyǵys Azııadaǵy bólimshesi Qazaqstan týrızmi týraly sheteldik saıahatshylarǵa arnalǵan nusqaýlyq jarııalady. Jýrnalıst ıAshıta Vashısht Qazaqstannyń biregeı kórikti jerlerin aralaı otyryp, sheteldik týrısterge qajet bolatyn nusqaýlyq jınaqtady.
«Ne isteý kerek, qaıda turý kerek jáne qandaı taǵamdar bar: Qazaqstan boıynsha eń úzdik marshrýt» dep atalatyn reportajda kóptegen qyzyqty málimet jarııalanǵan. Tipti, atalǵan maqalanyń mazmuny el turǵyndarynyń da qyzyǵýshylyǵyn týdyrdy. Avtor Qazaqstanǵa kelý úshin saıahatshylarǵa sáýirden mamyrǵa deıin nemese qyrkúıekten qazanǵa deıingi kezeńdi tańdaýdy usynady.
ıAshıta Vashıshttiń pikiri boıynsha, atalǵan kezeńderde siz taý peızajdarynyń panoramasynan jáne tańǵajaıyp dala keńistiginen lázzat ala alasyz. Travel+Leisure jýrnalısi Astana, Shymkent qalasy, Túrkistan oblysy, Almaty qalasy men onyń aınalasyndaǵy kórikti jerlerge baryp, Qazaqstan boıynsha jeti kúndik saıahat jasady. Sonymen qatar jýrnal ókili Qazaqstanǵa kelgennen keıin vıza qoljetimdiligi, aǵylshyn tiline aýdarmasy bar qazaq tilindegi sóz tirkesteri, qonaq úıler men ulttyq taǵamdardy tańdaýda paıdaly aqparatty jınady.
Travel + Leisure – Nıý-Iorkte ornalasqan saıahat týraly jýrnal. Basylym jylyna 12 ret shyǵady, derekter boıynsha jýrnaldyń oqyrman sany – 4,8 mıllıon.
Saıahat týraly basylymda týrıstik saparlarǵa mamandanǵan jáne kóbine saıahatshy emes jazýshylar, aqyndar, sýretshiler, dızaınerler men jýrnalısterdiń maqalalary jarııalanady.
Sonymen qatar jýrnal modelderdiń saıahattaǵy jáne bedeldi jaǵdaıda demalyp jatqan fotosýretterin jarııalaǵan muqabalarymen tanymal. Travel+Leisure búkil álem boıynsha 16 mıllıon saıahatshylar qaýymdastyǵyn biriktiredi jáne shtatta 100-den astam saıahat týraly jazatyn jýrnalısteri men fotograftary bar.
