Áıgili sýretshi Salvador Dalıdiń múrdesi eksgýmatsııalandy
ASTANA. QazAqparat - Belgili ıspandyq sýretshi Salvador Dalıdiń (1904-1989) súıegi Ispanııanyń Fıgeras qalasynda beısenbi kúni keshke eksgýmatsııalandy. Oǵan negiz - Salvador Dalıdi óziniń ákesi ekendigin aıtyp otyrǵan áıeldiń talaby. Bul týraly Reuters habarlady.
Sot saraptamasy salasyndaǵy mamandar zańgerlerdiń qatysýymen marqumnyń balzamdalǵan denesinen DNK synamalaryn aldy.
Katalonııa turǵyny Pılar Abel ózin sýretshiniń qyzy dep taný úshin sotqa talap-aryz túsirgen. Sot Salvador Dalıdi áıeldiń bıologııalyq ákesi bolyp tabylatyndyǵyn anyqtaý úshin eksgýmatsııaǵa ruqsat berdi. 1956 jyldyń 1 aqpany kúni dúnıege kelgen áıel óziniń anasy Dalımen jasyryn túrde kezdesip turǵanyn aıtýda. 2007 jyldan beri Pılar Abel sýretshimen týysqan ekendigin dáleldeýge tyrysyp keledi. Abeldiń aıtýynsha, ol Dalıdiń qyzy ekendigin ájesinen bilgen. Eger DNK-test áıeldiń sózin rastaıtyn bolsa, ol onyń tegin ıelenip, týyndylaryna avtorlyq quqyq ala alady.
Salvador Dalı 1904 jyly 11 mamyr kúni dúnıege kelgen. Óziniń shyǵarmashylyǵynda júzdegen kartına saldy.
Dalıdiń jubaıy Qazan qalasynyń týmasy Elena Dıakonova (1894-1982) boldy. Sýretshi 1989 jyly 23 qańtar kúni dúnıeden ozdy. Onyń beıiti Fıgeras qalasyndaǵy Dalı teatr-mýzeıiniń sahnasynyń uńǵylynda ornalasqan.
