Áıgili saqtandyrý kompanııasynyń eks-basshylary 15 jylǵa sottaldy
ALMATY. QazAqparat - «AMANAT INSURANCE» saqtandyrý kompanııasynyń burynǵy basshylary 15 jylǵa sottaldy, dep habarlaıdy QazAqparat tilshisi.
Sottalýshylar saqtandyrý kompanııasynan 31 000 000 teńge óndirip almaq bolǵan.
Qalalyq sot baspasóz qyzmetiniń habarlaýynsha, sot úkimin Almaly aýdandyq sotynyń sýdıasy shyǵardy.
Іs materıaldaryna sáıkes, kompanııanyń burynǵy basqarýshy dırektorlary, úsh áıel bótenniń qarjysyn alaıaqtyq jolmen jymqyryp kelgen.
Jáýtikova Gúljan men Pısareva Svetlana sol kezdegi basqarma tóraǵasynyń keńesshisi Seıitova Záýremen birlese otyryp, ózderiniń eńbek kelisimshartyna qosymsha jalǵan kelisim daıyndaǵan.
Osylaısha osy qujatpen olar basqarma tóraǵasynyń mindetin atqarýshyny sotqa berip, ótemaqy tóleýin talap etken. Nátıjesinde sot olardyń shaǵymyn qanaǵattandyryp, Pısarevaǵa - 628826 teńge, Jáýtikovaǵa - 606 677 teńge ótemaqy tólendi.
Ózderiniń qylmystyq áreketterin júzege asyrý maqsatynda olar jalǵan kelisimshart boıynsha taǵy da ótemaqy talap etip sotqa júginedi. Seıitova Záýre óz kezeginde olardyń aryzyn qoldaıdy.
Sot sheshimimen Pısareva men Jáýtikovaǵa 1 218 986 teńge jáne sáıkesinshe 1 215 008 teńge berildi.
«Osylaısha bul úsh áıel ózara sóz baılanysa otyryp, ózderiniń qyzmettik laýazymyn paıdalanyp, bógdeniń múlkin qymqyrǵany áshkerlendi. Sottalýshylardyń kesirinen «AMANAT INSURANCE» saqtandyrý kompanııasy AQ-na asa iri mólsherde 3 669 497 teńge materıaldy shyǵyn keltirgen», - delingen habarlamada.
Munymen qoımaı aryzdanýshylar taǵy da sotqa shaǵym túsirip buzylǵan quqyqtary úshin 31 200 000 teńge ótemaqy talap etken.
Alaıda aýdandyq sot olardyń bul aryzyn qanaǵattandyrýsyz qaldyrady.
Kompanııanyń eks dırektorlary Aýdandyq sottyń sheshimin appelıatsııaǵa beredi. Appelıatsııalyq kollegııa olardyń shaǵymyn ishinara qanaǵatandyryp, ekeýine 13 800 000 teńge men 17 400 000 teńge kóleminde ótemaqy tóleýdi talap etti.
Biraq kassatsııalyq sot kollegııasy appelıatsııalyq sottyń úkimin buzyp, aýdandyq sottyń úkimin ózgerissiz qaldyryldy.
«Osylaısha kompanııanyń burynǵy dırektorlary Pısareva, Seıitova, Jáýtikova úsheýi ózara ymyralasa otyryp, 31 200 000 teńge kóleminde aqsha óndirý týraly oı-pıǵyldaryn júzege asyra almaı qaldy», - delingen úkimde.
Sot sheshimimen sottalýshy úsh áıeldiń árqaısysy QR QK 385-babynyń 2-bólimimen, 190-babynyń 3-4 bólimderimen, 24-babynyń 3-bólimimen aıypty dep tanylyp 5 jylǵa bas bostandyǵynan aıyryldy.
Alaıda QR «Qazaqstan táýelsizdigine 25 jyl tolýyna oraı raqymshylyq» týraly zańynyń 4-babyna sáıkes árqaısysynyń sottalý merzimi 2 jyl 5 aıǵa qysqardy.
Sot úkimi zańdy kúshine engen joq.
