Áıgili mıýzıkldi aýdarý ońaıǵa túspedi - Serikzat Dúısenǵazy «Notre Dame de Paris» jaıly
ASTANA. QazAqparat - Gınnestiń rekordtar kitabyna engen álemdik «Notre Dame de Paris» mıýzıkliniń kúni keshe Astanada premerasy ótken bolatyn. Álemdik jaýhar sanalatyn osynaý mıýzıkldi aýdarýǵa Serikzat Dúısenǵazy jarty jylǵa jýyq ýaqyt jumsaǵanyn aıtady. Aqynnyń sózine qaraǵanda, aýdarma barysy da, mıýzıkldiń jeke bólikterin qazaqy mentalıtetke beıimdeý de ońaıǵa túspegen, dep habarlaıdy QazAqparat tilshisi.
«Mıýzıkldiń avtory Rıkkardo Kochchante túpnusqany joǵaltpaı, shyǵarma aýdarylǵan eldiń mentalıtetine, dúnıetanymyna saı jetkizilýi kerektigin qatty eskertti. Mysaly, aıtalyq bul shyǵarmanyń atynyń ózi bizdiń mentalıtetke kelmeıdi. «Sobor Parıjskoı Bogomaterı» - «Qudaı ananyń sobory» dep aýdarylady. Al bizde «Qudaı ana» degen túsinik joq. Qazaqta «Áz ana» degen uǵym bar. Shyǵarmada sondyqtan Áz ana degen uǵymdy engizdik. Men bir ǵana mysaldy atap otyrmyn. Osyndaı bizdiń dúnıetanymymyzǵa kelmeıtin uǵymdardy ózimizdiń mádenıetimizge qaraı keltirýge barymyzdy saldyq», - deıdi ol.
Serikzat Dúısenǵazynyń aıtýyna qaraǵanda, mıýzıkldegi uǵymdardy úılestirý jumysy avtorlarmen birge kelise otyryp, júrgizilgen.
«Bul - án. Máselen, Shekspırdiń «Otellosyn» Muhtar Áýezov qazaq tiline aýdardy. Ol negizinen qara sózben jazylǵan. Qara sózdi aýdarý ońaıyraq. Al munda daıyn ánge sózdi alyp kep úılestire otyryp salý kerek boldy. Býyny kelip, aıtylýy jeńil bolýy erekshe baqylandy. Kez kelgen sózdi ánge qoıa da almaısyz. Sebebi, sózdiń reti sahnadaǵy ánshiniń tynysyna dál kelýi kerek. Osy sátke kelgende qıynshylyqtar kezdesti. Biraq, bul rette bizdiń burynǵy ánge sóz jazý tájirıbesi kómektesti dep oılaımyn. Álbette, áriptester tarapynan kóp adamnan kómek boldy. Biraq, bul rette eń kóp kómekti Rıkkardo Kochchanteniń ózi kórsetkenin erekshe atap ótkim keledi. Rıkkardo mıýzıkl ánine sóz salyp otyrǵan kezde kóp sózderdiń sınonımin de surap otyrdy. Birige mıýzıkldi aýdaryp shyqtyq. Osy máseleniń bári eskerildi», - deıdi aqyn.
Mıýzıkldi sapaly túrde qazaq tiline aýdarý úshin aqyn Frantsııaǵa eki márte baryp qaıtqanyn aıtady. Serikzat Dúısenǵazy óz sózinde atap ótkendeı, bizdiń el mádenıeti men tilin álemge tanytýǵa qashan da múddeli.
«Álemdegi eń alpaýyt elderdiń tilderine aýdarylǵan mıýzıkldiń qazaq tiline aýdarylǵanyna biz qýanyshtymyz. Sebebi, TMD aıasynda táýelsizdik alǵan memleketterdiń ishinde mundaı álemdik jaýhardy birinshi bolyp biz qazaq tiline aýdaryp otyrmyz. Frantsııa elinde teatr mádenıeti san ǵasyrǵa ketedi. Sondyqtan, osyǵan bastamashyl bolǵan azamattarǵa rızashylyǵymyzdy bildiremiz. Áıgili mıýzıkl arqyly da qazaq tilimizdi álemge tanytamyz degen oıdamyn. «Notre Dame de Paris» mıýzıkli Qazaqstan men Frantsııa teatrlarynyń baılanystaryna úlken altyn kópir bolsyn dep tilek aıtqym keledi», - deıdi Serikzat Dúısenǵazy.
Eske sala ketsek, kúni keshe Beıbitshilik jáne Kelisim saraıynda Gınnestiń rekordtar kitabyna engen álemdik «Notre Dame de Paris» mıýzıkliniń qazaq tilindegi tusaýkeseri ótken bolatyn. Mádenıet jáne sport mınıstrliginiń uıymdastyrýymen «Qazaqconcert» memlekettik kontserttik uıymy usynǵan, ańyzǵa aınalǵan «Notre Dame de Paris» mıýzıkliniń qazaq tilindegi premerasynda zalda ıne shanshar oryn bolmady. Mıýzıkl Astanada alǵash ret qoıylyp jatqanyn aıta ketý kerek. Shynaıy ǵashyqtyq pen satqyndyq hıkaıasy, senim men ǵajaıypqa toly qoıylym kɵrermenderdi tamsandyrǵany zaldaǵy qoshemetten aıqyn baıqalǵany haq. Sahnada XX ǵasyrdyń eń úzdik ənderi shyrqaldy.
Erekshe atmosfera syılaıtyn frantsýzdyq shanson jelisindegi mıýzıklin 24 jeltoqsanǵa deıin Beıbitshilik jəne Kelisim saraıynda tamashalaýǵa bolady.
