Áıgili mýzykant Zýbın Meta Túrkistanda boldy
ASTANA. QazAqparat - Dırıjer retinde qazirgi zamannyń áıgili mýzykanty Zýbın Meta jáne QR Mádenıet jáne sport mınıstri Arystanbek Muhamedıuly Túrkistan qalasynda boldy, dep habarlaıdy Ońtústik Qazaqstan oblysy ákimdiginiń baspasóz qyzmeti.
Tanymal mýzykant, dırıjer Zýbın Meta EKSPO-2017 kórmesine qatysyp, LaSkala teatry qazaqstandyq kórermenderdiń nazaryna Uly kompozıtorlardyń máńgilik týyndylary - Djýzeppe Verdıdiń «Falstaf» operasyn jáne L.Bethovenniń sımfonııasyn usynýy josparlanǵan. Osy maqsatta TMD elderi arasynda tuńǵysh ret Astana qalasyna taban tiregen Zýbın Meta Túrkistan qalasynda sáýlet óneriniń ozyq úlgisi, rýhanı mura Q.A.ıAsaýı kesenesin tamashalady.
Belgili óner ıesin zor qoshemetpen qarsy alǵan túrkistandyqtar mártebeli meımandarǵa ulttyq dástúrmen órnektelgen jón-joralǵymen erekshe qurmet kórsetti. Túrkistan qalasynyń ákimi Á.Óserbaev ystyq yqylasyn jetkizip, Zýbın Metaǵa shapan jaýyp, qazaqtyń qyl qobyzyn tartý etti. Sonymen birge, qalalyq «Aqsaqaldar alqasynyń» tóraǵasy J.Áziretbergenuly mýzyka áleminiń kórnekti tulǵasyna barsha Túrkistan halqynyń sálemin joldap, mol shyǵarmashylyq tabys tiledi.
Osylaısha sapar Q.A.ıAsaýı kesenesimen tanysýǵa ulasty. Sonaý zamandardan syr shertetin keseneniń bólmelerin aralap, ulttyń ulylyǵynan aqpar alǵan Zýbın Meta jýrnalısterge bergen suhbatynda qazaq halqynyń dúnıetanymyna, rýhanı muralarǵa degen qurmeti men qonaqjaılyǵyna erekshe tańdanysyn jetkizdi. Sondaı-aq, ol «Elbasylaryńyz N.Á.Nazarbaevtyń el basqarýdaǵy kemeńgerligi maǵan aıryqsha baıqaldy. Az ýaqyt ishinde sáýlettik kelbeti áleminiń ózge qalalaryna uqsamaıtyn Astanadaı qala turǵyzyp, jas memleketti órkenıeti bıik, áleýeti joǵary elge aınaldyrǵany aıqyn sezilip tur. Qazaqstanǵa onyń ishinde Astana qalasyna jasaǵan saparym maǵan erekshe áser berdi. Al, Túrkistan qalasy jáne onyń qonaq kelse qushaǵyn keń jaıatyn darhan peıildi turǵyndaryn men umytpaımyn. Bul memleket jáne onyń halqy jaıly keń nasıhat bolýy kerek dep esepteımin jáne men júrgen jerimde qazaq eli týraly aıta júretin bolamyn», - dep Qazaqstanǵa jasaǵan saparyn joǵary baǵalady.
Áıgili mýzykantpen birge kelgen jubaıy Nensı Meta: «Men Qazaqstanǵa kelgenge deıin bul el týraly múlde basqasha kózqarasta edim. Mine, osy saparda Nursultan Nazarbaev basqaratyn Qazaqstan memleketiniń órkendep ósip kele jatqanyn jáne onyń halqynyń bolashaqqa degen seniminiń nyq ekendigine kóz jetkizdim», - dep pikir bildirdi.
Sapardy qorytyndylaǵan QR Mádenıet jáne sport mınıstri Arystanbek Muhamedıuly óz sózinde: «Qazaqstanǵa sapar shegip otyrǵan álemge aty máshhúr Zýbın Metanyń kelýi úlken mártebe jáne de qurmetti qonaqtyń osynda kelip qana qoımaı LaSkala teatry qazaqstandyq kórermenderdiń nazaryna Uly kompozıtorlardyń máńgilik týyndylaryn usynýy elimizdiń
órkenıetti elder qatarynda umtylýda aıtarlyqtaı beleske jetkendigin baıqatady. Elbasymyzdyń ulttyq ónerge, mádenıetimizge degen qamqorlyǵy qonaqtarymyzdy da beı-jaı qaldyryp otyrǵan joq. Sebebi, ónerdiń bıik shyńyn baǵyndyrǵan Zýbın Meta myrza elimiz jaıyndaǵy kóz qarasynda mádenıetimiz ben az ýaqyt ishinde oǵan jasalǵan qoldaýlardyń mol bolǵandyǵyn paıymdap, ultymyzdyń ónerge degen qurmetiniń joǵary ekendigin jetkizdi. Al, Túrkistan qalasyna jasaǵan saparynda ol kisi osyndaǵy qundy muralarymyzǵa erekshe qyzyǵýshylyq tanytyp, halqymyzdyń dúnıetanymynyń keń ekendigine taǵy bir kóz jetkizdi», - dep atap ótti.
