Áıgili qazaq munaıshysy dúnıeden ozdy
ALMATY. 8 qańtar. QazAqparat /Erbol Turymbetov/ - Búgin Almatyda qazaqtyń áıgili munaıshysy, osy salaǵa ata-tegimen eńbek etken tanymal jazýshy Rahmet Ótesinov 84 jasynda uzaqqa sozylǵan aýyr naýqastan kóz jumdy.
Ol otandyq munaı-gaz salasyna orasan eńbek sińirdi. 60-jyldardyń basynda Mańǵyshlaqtaǵy iri munaı oshaqtary - Ózen men Jetibaıdyń qurylýyna atsalysty. «Ózenmunaı» munaı-gaz óndirisi basqarmasynyń alǵashqy dırektory boldy. R. Ótesinov eńbegi KSRO men Qazaqstan Respýblıkasynyń joǵary memlekettik nagradalarymen marapattaldy. Ol eńbektegi kóp ýaqytyn munaı barlaý jumystaryna aýdardy, kadr máselelerine jaýaptylyqpen qarady, qarapaıym munaıshylardyń turmys jaǵdaılaryna kóp kóńil bóldi. Onyń arqasynda vahtalyq eldimekender myńdaǵan halyq turatyn qalalarǵa aınaldy. 1969 jyldyń qazanynda óz qyzmetin atqarý barysynda ol apatqa ushyrap, 1-toptaǵy múgedek bolyp qaldy. Alaıda, óz jumysyn jalǵastyra berdi. Іshki óndiris sharýashylyqtaryn parafın túzilimderi men ilespe gazdan qorǵaýǵa qatysty ǵylymı-tájirıbelik maqalalar jaza bastady. Ol taǵdyry qıyn munaıshylar jóninde jazylǵan birqatar eńbekterdiń avtory. 1987 jyly KSRO men Qazaqstan Jazýshylar odaǵynyń múshesi boldy.
Ony kópshilik qatal minezdi adam, Nıkolaı Ostrovskıı men Alekseı Maresevterdiń izbasary dep tanydy. Ol týraly fılmder túsirilip, kitaptar, gazet- jýrnaldar betterinde maqalalar jazyldy. Bar ómirin munaı óndirisine arnaǵan eńbekshiniń balalary da osy salada qyzmet etýde.
Óziniń kóp kitaptarynyń biri «Joldar jáne joldastar» eńbeginde R. Ótesinov: «Men munaımen, onyń máselelerimen ómir súrdim, munaı janashyry boldym, solaı qala beremin», dep jazǵan bolatyn. Ol Qazaqstannyń jer baılyǵy eli men halqyna qyzmet etetinine sendi.
Ataqty munaıshy óziniń týǵan jeri - Aqtaýda jerlenedi dep kútilýde.
