Áıgili gollıvýd akteri Djon Malkovıch ómirlik ustanymdarymen bólisti
ASTANA. QazAqparat - «Tynym tappańyzdar»! «Ómirlik ustanymyńyz qandaı?» degen suraqqa Astanadaǵy Qazaq Ulttyq óner ýnıversıtetinde baspasóz máslıhatyn ótkizgen gollıvýd aktery osylaı dep jaýap berdi, dep habarlaıdy «QazAqparat» HAA tilshisi.
Baspasóz máslıhaty barysynda akterǵa kásibi men kınoındýstrııaǵa qalaı kelgeni týraly birshama suraqtar qoıyldy. Akter kıno salasy qansha tartymdy bolǵanymen, jyldar boıy teatrdan da qol úzbepti. «EKSPO-2017» halyqaralyq kórmesin keshe tamashalaǵan ol Qazaqstan men Frantsııa elderiniń pavılondaryna arnaıy bas suǵyp qaıtqan. Djon Malkovıch ómiriniń on jylyn Frantsııada ótkizgenin eskersek, ózine ystyq ekinshi otany Frantsııa eliniń pavılonyn akterdiń tekten-tekke izdemegenin ańǵarýǵa bolady.
Tilshiler qaýymynyń biri oǵan «Ómirlik ustanymyńyz qandaı?» dep suraq qoıǵanda, akter azdap tosylyp qalǵandaı boldy.
«Birinshiden, álem qatty ózgerip ketti. Damýy jedel myna zamanda qalaı aqyl aıtarymdy bilmeımin. Men kınoındýstrııa salasynda biregeı qalypty ahýal týyndaı qalǵan ýaqytta ósip, kıno salasy órkendegen memlekette jetildim. Ol kezde (AQSh-ta) kınoındýstrııa bir orynda edi. Qazir ol kınolar álemge tarap ketti. Sondyqtan, aqyl-keńes týraly ne aıtamyn?.. Ártúrli nusqalardy saralap kórińizder. Jumysty barynsha berilip atqaryńyzdar. Múmkindikterińizdi shyńdaı berińizder», - deıdi Gollıvýd aktery.
Djon Malkovıch adam jetistikke jetý úshin eshqashan toqtamaý kerektigin aıtady. Bul qaǵıdatyn ol óziniń ómirlik tájirıbesimen baılanystyrdy.
«Adam toqtamaý kerek. Jetistik bola ma, joq pa - ol jaǵy sonshama mańyzdy emes. Bastysy - óz-ózińizge adal bolyńyz. Tájirıbe bóliserde barynsha ashyq bolǵanyńyz abzal. Tájirıbeni izdegennen talmaý kerek. Men osyndaı jolmen júremin. Ózim eshqashan bir orynda turmaımyn. Ylǵı izdenistemin. Ózimdi rejısser, akter, teatr aktery, prodıýsser retinde synap, dızaın salasymen de aınalystym. Klassıkalyq mýzykalardy jazamyn. Eń bastysy, tynym tappańyzdar», - dep túıgen akter kópshiliktiń qoshemetine bólendi.
Eske sala ketsek, tanymal gollıvýd aktery Djon Malkovıch Astanaǵa keshe ushyp kelgen bolatyn. HІІІ «Eýrazııa» halyqaralyq kınofestıvaliniń qurmetti meımany Qazaqstandy aralap shyqqysy keletinin aıtady. Buǵan deıin Astanaǵa gollıvýdtyń ózge de jarqyn juldyzdary Nıkolas Keıdj men Edrıan Broýdı kelip ketken edi.
