Áıgili fýtbolıst F. Kanýte aýyz bekitken kemtar jigitke 1 myń fýntty sadaqa etti

«Jýyrda ǵana Derbı ýnıversıtetinde jýrnalıst mamandyǵy boıynsha dıplom alyp shyqqan Imran Adam osymen onynshy jyl qatarynan oraza ustap keledi. Alaıda, syrqatyna baılanysty ol ózgelerdiń kóńili men kómegine muqtaj ekenin aıta ketý kerek»,- dep jazady muslim.kz saıty.

Arbaǵa tańylǵan Imran Adam Frederık Kanýteniń bul járdemine rıza ekenin aıtyp, alǵysyn bildirdi. Kanýte Tottenhemniń jáne Ispanııadaǵy Sevılıanyń shashbaýyn kóterip, fýtbol alańynda oıyn órnegin kórsetken ataqty oıynshylardyń biri. Onyń Sevılde kelisimshart boıynsha ǵıbadat úıiniń qyzmetin atqaryp kelgen ǵımarattyń paıdalaný merzimi bitken soń, ony musylmandardyń ıgiligi úshin satyp alyp, taǵy bir saýapty iske muryndyq bolǵany bar. I. Adamǵa qarjyny Kanýteniń qaıyrymdylyq qory aýdardy. Atalmysh qor jetim qalǵan balalar men Malıdegi jaǵdaıy nashar otbasyndaǵy balalarǵa kómek kórsetýmen aınalysady.

Frederık Kanýte Islamdy osydan 12 jyl buryn 20 jasynda qabyldaǵan bolatyn. Onyń qumar oıyn veb-saıtynyń jarnamasy beınelengen «Sevıl» jeıdesin kııýden bas tartqany áli kúnge deıin qalyń jurtshylyqtyń esinde. «Býkmekerlik qyzmet - ibilistiń las tirligi, men mundaı jeıdeni kımeımin, buǵan Quranda tyıym salynǵan», - deıdi ol.