Áıgili «Dosmuqasan» tobynyń qurylǵanyna bıyl 50 jyl toldy
ASTANA. QazAqparat - Qazaqtyń mýzyka óneri salasynda óshpes iz qaldyrǵan áıgili «Dosmuqasan» tobynyń qurylǵanyna bıyl 50 jyl tolyp otyr. Aty ańyzǵa aınalǵan vokaldy-ınstrýmentaldy ansambl 1967 jyldyń 1 tamyzynda qurylǵan. Bul týraly atalmysh top ókilderi ózderiniń Feısbýk jáne Instagram paraqshalarynda jazdy.
1967 jyldyń 1 tamyzynda Pavlodar oblysynyń Baıanaýyl aýylynda «Dosmuqasan» tobynyń alǵashqy kontserti ótti.
«1969 jyly «Dosmuqasan» qalanyń erikti túrde qurylǵan jetekshi ujymdarynyń televızııalyq baıqaýynda birinshi oryndy jeńip alyp, qalalyq komıtettiń syılyǵyna ıe boldy. Osy jyldyń jaz aıynda ansambl Býdapesht radıosynyń Dýnaı jaǵalaýynda ınternatsıonal jastar arasynda uıymdastyrǵan halyqaralyq deńgeıdegi án baıqaýynda jeńimpaz atandy. Ansambl ártisteri arab, úndistan, bolgar, cheh, aǵylshyn jáne polıak stýdentterimen birge baq synasyp, Vengrııanyń «Altyn gıtaralar» estradalyq ánder baıqaýynda Halyqaralyq baıqaýdyń laýreaty ataǵyn jeńip aldy»,-dep jazdy tanymal toptyń ánshileri.
Ártisterdiń aıtýynsha, bul ansambldiń sheteldegi alǵashqy gastrólderi bolatyn. Shyndap kelgende Vengrııaǵa sapardy taza mýzykalyq baǵyttaǵy dep aıtý qıyn edi.
«Dostas memleketke top músheleri halyqaralyq qurylys otrıadtarynyń qatarynda attanyp, sonymen birge olar jergilikti halyqqa óz ónerlerin de pash etti»,-dep jastyq shaqtaryn eske alady ártister.
Osy oqıǵalardan soń jarty ǵasyr ótkennen keıin de ansambl músheleri ónersúıer qaýymdy ózderiniń ásem ánderimen tánti etken. Olardyń ánderin búginde eresekter de jastar da asqan súıispenshilikpen tyńdaıdy.
Osydan 50 jyl buryn, 1967 jyldyń 1 tamyzynda Baıanaýylda «Dos-Muqasan» ansambliniń mýzykanttary ózderiniń alǵashqy kontsertin qoıdy. @ztb_kz
