Áıgili Dior modeli - qazaq qyzy Alla Ilchýn týraly kitap jaryq kórdi

Álemge áıgili frantsýz dızaıneri Krıstıan Dıordyń modeli Alla Ilchýnnyń ómiri baıandalǵan bul kitapty «Frantsııadaǵy qazaqstandyqtar qaýymdastyǵynyń» tóraǵasy, ekonomıst Berlın Irıshev jazǵan.

«Kitaptyń avtory Berlın Kenjetaıulyna úlken alǵys aıtqym keledi. Berlın Irıshev táýelsiz Qazaqstannyń bank júıesindegi alǵashqy jetekshilerdiń biri bolǵan. Keıinirek uzaq jyl shet memlekette jumys istedi, Frantsııadaǵy Qazaqstan ókili boldy. Qazaqstannyń mádenıetine de úlken úles qosyp júr», - dedi QR Mádenıet jáne sport mınıstri Arystanbek Muhamedıuly QR Ulttyq akademııalyq kitaphanasynda ótken tusaýkeserde.

Avtordyń ózi dúnıejúzilik sán álemine tanylǵan tuńǵysh azııalyq jáne tuńǵysh qazaq qyzy týraly qoǵamnyń habarsyz ekenin jetkizdi.

«Krıstıan Dıormen jumys istegende, Alla Ilchýnge búkil álem tamsanyp qaraǵan. Ol kıip shyqqan kıimder kóz ilespes jyldamdyqpen satylyp ketetin. Fotomodel bolyp júrgen 20 jylda Alla Ilchýndi álem halqy qytaı dep oılap keldi. Sebebi, ol Harbınde dúnıege kelgen, aýmaly-tókpeli 1930-jyldary Parıjge kóshken. Biraq, ómiriniń sońǵy jyldary model jýrnalısterge bergen suhbatynda ákesiniń qazaq ekenin, Qýanthan Elshinniń qyzy ekenin málimdegen», - deıdi avtor.

Kitap qaýymdastyq músheleriniń qarajatyna jaryq kórgen jáne bastamashyl top Alla Ilchýn týraly aǵylshyn, frantsýz, orys tilderinde jaryq kórgen maqalalardy jınaǵan.

«Málimet izdeý barysynda Krıstıan Dıor men Iv Sen Loran sán úılerimen baınalys ornattyq. Alla Ilchýnniń qabirin taýyp, jalǵyz uly Mark Jost de Dıýlmenmen kezdestik. Modeldiń uly buǵan deıin beımálim bolyp kelgen derektermen jáne otbasylyq fotosýrettermen bólisti. Munyń barlyǵy jańa kitapqa engizilgen», - deıdi B. Irıshev.

Avtordyń aıtýynsha, ázirge 2,5 myń dana kitap orys tilinde shyǵaryldy. Aldaǵy ýaqytta bul eńbek frantsýz jáne qazaq tiline aýdarý josparlanyp otyr. Odan bólek, frantsııalyq-ıtalııalyq shyǵarmashylyq top Alla Ilchýn týraly kórkem fılm túsirýdi usynyp otyr.