Áıgili ártister Astanada qoıylatyn «Bogema» operasynda óner kórsetedi

Eń ádemi soprano daýysynyń ıesi Sandra Plamenats jáne armıandyq bas Bajbeýk-Melıkıan Sarkıs Dj. Pýchchınıdiń «Bogema» operasynda óner kórsetedi.  Shaqyrylǵan vokal sheberlerimen qatar 5 mamyrda «Astana Opera» Úlken zalynda  qazaqstandyq ártister - Nurlan Bekmuhambetov, Talǵat Musabaev, Álfııa Kárimova, Evgenıı Chaınıkov shyrqaıdy. Dırıjerlik tizginde - Qazaqstannyń eńbek sińirgen qaıratkeri Erjan Dáýitov.  Rejısseri - Natalıa Kagadıı.

Sandra Plamenats tiginshi Mımıdiń partııasyn oryndaýǵa daıyndalýda. Suranysqa ıe ánshi óziniń joǵary kásibı sheberligimen tanymal, qaharmandaryn jaqsy túsiný  jáne sahnada tereń beınelerdi jasaý úshin negizgi mýzykalyq bilimi bar (Máskeý konservatorııasy) ol venalyq jáne máskeýlik fılologııalyq fakýltet pen shet tilderi fakýltetin bitirgen. Barlyq operalar áıgili ádebı shyǵarmalardyń jelisi boıynsha qoıylǵany belgili, osy oraıda atalǵan oqý oryndarynda ol qaınar kózderden bilim nárin sýsyndady. Aıta ketsek, Dj. Pýchchınıdiń «Bogema» operasy Anrı Mıýrjeniń «Bogema ómirinen kórinister» shyǵarmasy boıynsha jazylǵan.

«Men ózimniń keıipkerimmen maqtanamyn. Opera jelisi 1830 jyly Parıjde órbıdi. Tipti búgin de ol jerde jalǵyz ómir súrý qıyn, al Mımı bolsa, sol ýaqytta Parıjdiń Latyn kvartalynan ózi páter jaldap turady jáne ózi jibekti kesteleıdi - bul óte kúrdeli jáne kóp eńbekti kerek etetin shyǵarmashylyq jumys, ol osy tabysymen kúnin kóredi. Árıne, onyń ómiri qaıǵyly aıaqtalady, biraq ol súıikti isimen aınalysa otyryp, erkin ómir súrdi jáne súıikti adamyn kezdestirdi. Mımıdiń taǵdyry ómirdiń árbir sátin baǵalaý qajet ekenin túsinýge kómektesedi. Men bul partııany «Astana Opera» sahnasynda qýana-qýana oryndaımyn. Bul meniń Qazaqstanǵa alǵashqy kelýim, áıtse de men qazaqtyń kórkem tabıǵaty týraly Abaı Qunanbaevtyń óleńderinen oqydym jáne bul sıpattamany rastaıtyn kóp beınetúsirilimderdi qaradym», - deıdi Sandra Plamenats.
 

Armıandyq bas Sarkıs Bajbeýk-Melıkıan Kollen partııasyn oryndaıdy, onyń aýqymy jaǵynan zor jáne barlyq regıstr boıynsha ádemi daýsy alys jáne jaqyn shet eldegi túrli sahna tyńdarmanyn tánti etedi.

«Bogema» - stıli men rýhy boıynsha frantsýzdyq deýge bolatyn, tańqalarlyq názik sezimmen erekshelenetin ıtalııalyq opera. Oqıǵa jelisi Parıjdiń Latyn kvartalynda Rojdestvo qarsańynda órbıdi. Opera keıipkerleriniń bári jastar. Bular kedeı zııaly qaýym, parıjdegi mansarda turǵyndary: aqyn Rýdolf, sýretshi Marsel, mýzykant Shonar jáne fılosof Kollen. Ómirleriniń serigine aınalǵan muqtajdyqqa qaramastan, olar kóńilderin túsirmeı, qıyndyqtardy ázilmen qarsy alady. Kúndelikti ómirleri qýanysh pen poezııaǵa, dostyq pen mahabbatqa toly.

Ártister kórermenge kúndelikti qam-sharýany biraz ýaqytqa qoıa turyp, opera qoıylymynan barynsha raqat alýǵa, sondaı-aq «Bogema» operasy keıipkerlerinen, tipti, eń qıyn jaǵdaıdyń jaqsy jaǵyn kóre bilýdi úırenýge jáne óz baqytyń úshin kúresýdi toqtatpaýǵa shaqyrdy.