Áıgerim Sáttibaeva Azııa chempıonatynyń jartylaı fınalyna shyqty
ASTANA. KAZINFORM - Mońǵolııa astanasy Ulanbatyr qalasynda ótip jatqan World Boxing aıasyndaǵy 2026 jylǵy Azııa chempıonatynda el quramasynan 5 sáýirde alǵashqy bolyp Áıgerim Sáttibaeva (48 keli) shyqty.
Otandasymyz shırek fınalda ózbekstandyq Álem chempıonatynyń 2 márte qola júldegeri Sabına Bobokýlovamen qolǵap túıistirdi.
Alǵashqy eki raýndta qarsylastar bir-birine kóbirek soqqy jumsap, upaı qoryn molaıtýǵa tyrysty. Nátıjesinde tóreshiler olar teń deńgeıde jekpe-jek ótkizdi dep baǵalady.
Sheshýshi raýndta da Áıgerim qaryqnyn báseńdetken joq. Osylaısha ol qarsylasynan basym túsip, jartylaı fınalǵa joldama aldy.
Áıgerim Sáttibaeva – birneshe dúrkin Qazaqstan chempıony jáne 2010 jylǵy Azııa birinshiliginiń qola júldegeri. Ol uzaq úzilisten soń 2023 jyly boksqa oralǵan edi.
Sondaı-aq búgin kúndizgi sessııada 8-jupta Uljan Sársenbek (57 keli) taılandtyq Pýnraýe Rýenrospen sheberlik baıqasty.
Qazaqstandyq taǵy úsh boksshy Qazaqstan ýaqytymen 14:00-de bastalatyn keshki sessııada synǵa túsedi. Aldymen 4-jupta Sabyrjan Aqqalyqov (75 keli) japonııalyq Taıga ıAgımen sharshy alańǵa shyqsa, 7-jupta Erasyl Jaqpekov (80 keli) ózbekstandyq álem chempıony Fazlıddın Erkınboev, 11-jupta Saǵyndyq Toǵambaı (90 keli) qytaılyq Hýejen Hanmen qolǵap túıistiredi.
Aıta ketsek, 4 sáýirde qurlyqtyq dodada Aıbek Oralbaı (90 keliden joǵary), Valentına Halzova (75 keli), Ertýǵan Zeınýllınov (65 keli), Orazbek Asylqulov (60 keli) jartylaı fınalǵa joldama alsa, Sanjar Tashkenbaı (50 keli), Laýra Esenkeldi (65 keli) jarys jolyn aıaqtady.
