Áıgerim Aǵyltaeva Qorǵanys mınıstriniń kommýnıkatsııalar jónindegi keńesshisi bolyp taǵaıyndaldy

ASTANA. KAZINFORM — Áıgerim Aǵyltaeva Qorǵanys mınıstriniń kommýnıkatsııalar jónindegi keńesshisi – resmı ókil bolyp taǵaıyndaldy. Bul týraly vedomstvonyń baspasóz qyzmeti málim etti.

Áıgerim Aǵyltaeva jýrnalıstıka salasyndaǵy kásibı bilimin Abylaı han atyndaǵy Qazaq halyqaralyq qatynastar jáne álem tilderi ýnıversıtetinde jáne KIMEP ýnıversıtetinde (magıstratýra) alǵan. Ál-Farabı atyndaǵy Qazaq ulttyq ýnıversıtetin bitirip, saıasattaný ǵylymdarynyń magıstri dárejesin ıelengen.

«Bolashaq» halyqaralyq stıpendııasy aıasynda Nıý-Iork kınoakademııasynda «Prodıýserlik» mamandyǵy boıynsha bilim alyp, AQSh-taǵy Djordjııa ýnıversıtetinde mýltımedıalyq jýrnalıstıka baǵytynda taǵylymdamadan ótken.

Eńbek jolyn KTK telearnasynda tilshi bolyp bastaǵan. Ár jyldary «Qazaqstan» respýblıkalyq teleradıokorporatsııasynda telejúrgizýshi jáne redaktor, prodıýser, «31 arnada» baǵdarlamalyq menedjer, «Almaty» telearnasynyń bas redaktory - departament dırektory, Qazaqstan Respýblıkasy Prezıdenti janyndaǵy Ortalyq kommýnıkatsııalar qyzmetiniń moderatory, «Jetisý» telearnasy bas dırektorynyń orynbasary, sondaı-aq Jetisý oblysy ákimi apparatynyń baspasóz hatshysy – baspasóz qyzmetiniń jetekshisi qyzmetterin atqarǵan.

Eske sala keteıik, buǵan deıin Qorǵanys mınıstriniń orynbasary taǵaıyndalǵanyn jazdyq.