Áıgerim Sopybekova - Qazaq memlekettik qyzdar pedagogıkalyq ýnıversıtetiniń 2013 jylǵy arýy
ALMATY. 28 naýryz. QazAqparat - Almatydaǵy Qazaq memlekettik qyzdar pedagogıkalyq ýnıversıtetiniń 2013 jylǵy eń úzdik arýynyń esimi belgili boldy.
Dástúrli túrde jyl saıyn ótetin «Ýnıversıtet arýy-2013» baıqaýynda qazylar alqasynyń sheshimimen pedagogıka jáne psıhologııa fakýltetiniń 1-shi kýrs stýdenti Áıgerim Sopybekova jeńimpaz atandy. 1-shi oryndy - jaratylystaný fakýltetiniń 1-shi kýrs stýdenti Merýert Nurǵabylova, 2-shi oryndy - qazaq fılologııasy jáne álem tilderi fakýltetiniń 2-shi kýrs stýdenti Juldyzaı Ábdimanapova, 3-shi oryndy - fızıka jáne matematıka fakýltetiniń 2-shi kýrs stýdenti Uljan Salǵaraeva jeńip aldy. Al áleýmettik-gýmanıtarlyq fakýltettiń 1-shi kýrs stýdenti Álııa Aýytova «Ónerli arý» dep tanyldy. Jeńimpazdardyń barlyǵyna gúlshoqtary tapsyrylyp, dıplomdarmen, aqshalaı júldelermen jáne arnaıy syılyqtarmen marapattaldy.
«Oqý ordamyzdyń qyzǵaldaqtaı qyzdary - erteńgi ıbaly da ınabatty kelin, bolashaq ana, salıqaly áje bolary tabıǵı zańdylyq. Batyrlyq pen qaırattylyqty ón boıyna qatar jınap, bııazylyǵymen ózin baǵalata biler qazaq qyzynyń taza da tunyq bolmysy - tektiligimizdiń aınasy. Sondyqtan asyl arýlarymyzdy tanyp, bilý ári nasıhattaý tárbıelik máni zor qundylyq», - deıdi ýnıversıtettiń áleýmettik máseleler jáne tárbıe isteri jónindegi prorektory Záýresh Sabyrova.
