Áıgerim Kúkeeva: qalaǵa kóship ketkenderdiń úshten bir bóligi aýyldaryna qonys aýdarýǵa daıyn
Aýyl jastarynyń II Respýblıkalyq forýmynda «Aýyl» halyqtyq - demokratııalyq patrıottyq partııasynyń bastamasymen «Aýyl» HDPP jastar qanatynyń erejelerine ózgertýler engizý maqsatynda jańa quramǵa daýys berildi. Forýmǵa qatysýshylar Atqarý komıtetiniń jańa quramyn maquldap, jastar qanatynyń tóraǵasyn saılady. Bul qyzmetke S.Seıfýllın atyndaǵy QazATÝ-dyń tárbıe jumysy departamentiniń dırektory Áıgerim Kúkeeva biraýyzdan saılandy.
«Qazaqstanda 18 mıllıonnan astam turǵyn bolsa, onyń 14,5 mıllıony 14-29 jas aralyǵyndaǵy jas býyn. Elimizdiń qaı óńirinde bolsyn jastar bar. Olardyń kóp shoǵyrlanǵan jeri – aýyl. Jastardyń kúshin biriktirmeı aýyldy kórkeıtý – kúrdeli sharýa. Memlekettiń turaqty damýynyń negizi – básekege qabiletti jastar. Al bul tikeleı jas qazaqstandyqtardyń bilim men bilik sapasyna, yntasy men umtylysyna baılanysty. Sondyqtan memlekettik saıasattyń negizgi baǵyttarynyń biri – jastar sektory. Qazaqstanda jastar sektoryna aıryqsha nazar aýdarylýy tıis», - deıdi jastar qanatynyń tóraǵasy Áıgerim Kúkeeva.
Ol aýyl jastarynyń qalaǵa qonys aýdarý úrdisi qarqyn alyp kele jatqanyn aıtty.
«Oǵan birneshe faktor áser etýde. Ol – erteńge degen senimniń bolmaýy, jastardyń bos ýaqytynyń tıimsiz ótýi, medıtsınalyq qyzmet kórsetý sapasynyń tómendigi, sybaılas jemqorlyq. Aýyl turǵyndarynyń úshten bir bóligi ózderiniń eldi mekenderine qonys aýdarýǵa daıyn. Taldaý jumystary kórsetkendeı, óńirdegi jastardyń jaǵdaıy máz emes. Jastar óz ómirin aýylmen baılanystyrý úshin turaqty jumys, laıyqty eńbekaqy, ómir súrýge qolaıly ınfraqurylymnyń bolǵanyn qalaıdy. Eger belgilengen josparlar durys oryndalsa – memlekettik jastar saıasaty belgili bir nátıjege jeteri anyq. Al jastar ómiri sapaly, jańa deńgeıge kóteriledi», - deıdi ol.
