Áıgerim Beketaeva Borıs Eıfmannyń balet teatry trýppasynyń quramynda Ispanııada óner kórsetedi
ASTANA. QazAqparat - «Astana Opera» teatrynyń prıma-balerınasy Áıgerim Beketaeva Borıs Eıfmannyń Sankt-Peterbýrg memlekettik akademııalyq balet Teatry trýppasymen Ispanııadaǵy gastroldik sapar aıasynda óner kórsetedi. Balerına 6 naýryzda Valıadolıdte, 15 naýryzda Vıtorııada (Ispanııa) bıleıdi.
Teatrdyń baspasóz qyzmetiniń habarlaýynsha, Borıs Eıfman teatrynyń kórkemdik jetekshisi Áıgerim Beketaevany sheberligi mol, erekshe bıshi, óz isiniń naǵyz mamany, dep atap ótken. Onyń aıtýynsha, ol atalǵan teatr repertýaryn oryndaýǵa ábden qabiletti jáne ózin sol ortada erkin sezinedi. Klassıkalyq negizdi jaqsy ıgergen kóptegen ártister jańa horeografııalyq qımyldarǵa daıyn emes bolyp shyǵady. Áıgerim Beketaeva Kamıllanyń tehnıkalyq ári psıhologııalyq jaǵynan kúrdeli partııasyn laıyqty ıgerip, tipti oǵan jańa reńk engizgen.
Eske sala ketsek, Áıgerim Beketaeva osy trýppamen 2014 jyly sáýirde London jáne Býdapesht qalalarynda óner kórsetken edi.
«Zamanaýı balet óneriniń álemdik ortalyǵy dep tanylǵan Ulybrıtanııa astanasynda bıleý naǵyz synaq ekeni anyq. Áıgerim men bizdiń trýppanyń ártisteri bul synaqtan súrinbeı ótti. Londondyq kórermender oryndarynan turyp qol soqsa, jergilikti synshylar oryndaýshylardyń sheberligin joǵary baǵalady. Áıgerim Beketaevanyń seriktesi - Roden partııasyn bıleýshi Dmıtrıı Fısher boldy. Meniń oıymsha, olar sahnada birtutas plastıkalyq ári dramatýrgııalyq jup qura bildi. Ispanııada Áıgerim Beketaeva taǵy da Dmıtrıımen birge bıleıdi», - dedi Borıs Eıfman.
Óz kezeginde Áıgerim Beketaeva, ony árqashan jyly karsy alatyn áriptestermen birge eńbektenýge qýanyshty ekenin jetkizdi:
- Men olarmen áli kúnge deıin jaqsy qarym-qatynastamyn, hat almasyp turamyz, trýppa jetistikterine shyn júrekten qýanamyn. Olar da meniń shyǵarmashylyq ómirime kóz salyp, tusaýkesermen quttyqtap otyrady. Ekinshi márte shaqyrý - qazaqstandyq balettiń, ártisterimizdiń sheberligi joǵary deńgeıdegi ekenin kórsetedi. Kamılla partııasy - meniń eń súıikti partııalarymnyń biri, - dep atap ótti bıshi.
